İslam Əməkdaşlıq Gənclər Forumunun (İƏGF) Avrasiya üzrə Regional Mərkəzi təşəbbüsü ilə həyata keçirilən “Mənə Azərbaycanı göstər” layihəsi çərçivəsində xaricdə yaşayan bloggerlər Qarabağ bölgəsinin Füzuli şəhərində olub.

Ednews xəbər verir ki, layihənin iştirakçıları Misir, İraq, ABŞ, Qazaxıstan, Portuqaliya, Türkiyə və İndoneziyadan olan bloqqerlərin icmal videosunu hazırlayıb.

Bloqqerlər şəhərdə aparılan bərpa işlərinin, eləcə də mina sahələrinin təmizlənməsi və onların mülki əhali üçün təhlükə yaratmasının şahidi olublar. Təşkilatçılar həmçinin qonaqlara bildiriblər ki, Azərbaycan tərəfi Ermənistanı minalanmış ərazilərin xəritəsini təqdim etməyə çağırıb.

Xatırladaq ki, 1987-ci ilin sonlarında Ermənistan SSR-in Qafan rayonunda azərbaycanlıların öz tarixi torpaqlarından qəddarlıqla deportasiya prosesi başlayıb. 1988-1989-cu illərdə Ermənistanın müxtəlif şəhər və rayonlarında yaşayan azərbaycanlılar da eyni aqibətlə üzləşiblər. Ermənistanda yaşayan 250 mindən çox azərbaycanlı öz tarixi torpaqlarından zorla qovulub, onlardan 216 nəfər vəhşicəsinə qətlə yetirilib, 1154 nəfər isə yaralanıb. Onlar erməni zorakılığından öz həyatlarını xilas etmək üçün Azərbaycana sığınmaq məcburiyyətində qalıblar.

Azərbaycan Respublikasının Qarabağ və onun ətrafında olan Laçın, Kəlbəcər, Qubadlı, Zəngilan, Cəbrayıl, Ağdam (rayon mərkəzi və ərazisinin böyük hissəsi), Füzuli (rayon mərkəzi və ərazisinin böyük bir hissəsi) inzibati rayonları 1989-1993-cü illərdə Ermənistan tərəfindən işğal olunmuşdu.

30 il işğal altında olan bu ərazilər Azərbaycanın sənayesi və tikintisində böyük əhəmiyyəti olan müxtəlif növ tikinti materialları ilə çox zəngindir.

Ümumilikdə, son 30 il ərzində Azərbaycanda mina qurbanlarının sayı 3345 nəfər təşkil etməklə, 2020-ci il Vətən müharibəsinin başa çatmasından etibarən bu günədək 266 vətəndaşımız mina partlayışından zərər çəkib, onlardan 3 nəfər jurnalist daxil 45 nəfər həlak olub. Həlak olan 45 nəfərdən 35 nəfər mülki şəxsdir. Son 30 il ərzində minalardan zərər çəkənlərin isə 38 nəfəri qadın və 357 nəfəri uşaqdır.

2020-ci il sentyabrın 27-də Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq Azərbaycan Ordusu sonradan “Dəmir yumruq” adlandırılan əks-hücum əməliyyatına başladı. 44 gün davam edən Vətən müharibəsi təxminən otuzillik işğala son qoyulması və ərazi bütövlüyümüzün bərpası ilə nəticələndi. Müzəffər Ali Baş Komandan İlham Əliyevin rəhbərliyi ilə qazanılmış möhtəşəm Zəfər tariximizə qızıl hərflərlə yazıldı.

Oğuz Ayvaz 

• Tag:
• Azərbaycan
• mina
• Qarabağ