Xəbər verdiyimiz kimi, ABŞ-ın ən böyük banklarından “Silicon Valley Bank” və “Slivon Bank” iki gün ərzində müflis olub.
“Silicon Valley Bank” 2008-ci ildə baş verən qlobal maliyyə böhranından sonra iflasa uğrayan ən böyük ABŞ bankıdır. Bankların müflis olması dünyada maliyyə, iqtisadi sahələrə necə təsir göstərəcək?
Bu barədə Ednews-a iqtisadçı-ekspert Eyyub Kərimli münasibət bildirib. O, qeyd edib ki, ABŞ-dakı böyük bankların iflası dünya maliyyə və bank sistemi üçün böhran təhlükəsini yaradır.
“Bu 2 bankın birgə kapitalı 400 milyard dollar təşkil edirdi. Sözsüz ki, maliyyə bazarlarında müvafiq risklər, təlatümlər yaradır. Bu gün federal ehtiyatlar sisteminin iclası nəzərdə tutulub. İclasda sözügedən bankların fəaliyyəti ilə bağlı, eyni zamanda maliyyə və bank sektoruna təsirləri haqqında müzakirələr aparılacaq. Belə proqnozlar verilir ki, dünyada və ABŞ-ın digər maliyyə sistemlərinə və banklarına mənfi təsir göstərə bilər. Həmçinin gələcəkdə rəqəmsal valyutanın keçidini əngəlləyə bilər”.
İqtisadçının sözlərinə görə bankların çökməsi həmçinin, nağd hesablaşmalarda müəyyən problemlər yarada bilər. Dünyanın ipoteka bazarına öz mənfi təsirlərini göstərə bilər.
“Çünki, ABŞ bütün dünya ilə iqtisadi inteqrasiya aparır. ABŞ-da baş verən hər hansı bir proses digər ölklərə də təsir edir. Bu həm də maliyyə birjalarında da çaxnaşma yaradıb. Çox insanlar banklardan öz vəsaitlərini çəkmək fikirindədirlər. Bu da bir tərəfdən təzyiqləri artırır. 2008-ci ildə baş vermiş maliyyə proseslərindəki problemlər yenidən yaşana bilər. Müəyyən bankların fəaliyyətinin dayandırılması, bank sisteminin çöküşü və ya dünyada ipoteka, əmlak bazarlarına neqativ təsirləri ilə nəticələnə bilər”.
Ekspert vəziyyətin ölkəmizə təsirindən də söz açıb. Onun sözlərinə görə, bu vəziyyətin Azərbaycana təsirləri birbaşa olmasa da müəyyən tərpənişlər olacaq.
“Dünyada neftin qiyməti ucuzlaşsa, bu bizim ölkəyə də təsirini göstərə bilər. Neft-qaz gəlirlərimizə mənfi təsir edə bilər”.
Qeyd edək ki, ekspertlər bildirirlər ki, bankın uğursuzluğuna səbəb Mərkəzi Bankın (FED) faiz artımları ilə bağlı olub. İflas etdiyinə işarə isə səhmlərini satacağının elanını verməsi olub, bundan sonra isə müştərilər depozitlərini bankdan geri çəkmək istəyiblər.
Oğuz