Artıq Novruz bayramının yaxınlaşmasına sayılı günlər qalıb . Süfrələrimizi bayram axşamı bişirilən plovlar, müxtəlif mayonezli salatlar kilo almağımıza şərait yaratmaqla yanaşı, sağlamlığımıza da ciddi ziyan vura bilər.
Bəs, o zaman Novruz bayramında və ardınca gələn Ramazan ayı zamanı necə qidalanmalıyıq?
Mövzu ilə bağlı Ednews-a danışan düzgün qidalanma üzrə mütəxəssis Məhsəti Hüseynova bildirib ki, orqanizm hər hansı bayram və yaxud məclis deyə bir məfhumu qəbul etmir.
“Orqanizmin standart çalışma mexanizmi var. Bayram günlərində ağır kalorili, qızartma yeməklərinin həddindən artıq çeşidliliyi, bir- birinə uyumsuzluğu insan orqanizmində yüklənməyə səbəb olur”.
Mütəxəssis qeyd edib ki, uzun bayram günlərində bir neçə yemək bişirmək əvəzinə onların menyu şəklində hər gün bir çeşidini hazırlamaq daha yaxşı olardı.
“Həmin yeməklər nə qədər sağlam yemək olsalar da hazırlandıqdan bir gün sonraya qaldıqda ciddi fəsadlar yarada bilir. Insanlar istifadə edəcəkləri qədər hazırlamalıdırlar.
Novruz bayramından sonra gələn Ramazan ayında isə bəzən bunun mahiyyətini anlamayaraq, bir sıra səhvlərə yol açırlar. Çəki vermək niyyəti ilə daha az yeməklər yeyirlər və nəticədə orqanizmin sağlamlığı üçün zərərlidir“.
M.Hüseynova bunu da qeyd edib ki, insan orqanizminin enerjili olması, daxili orqanlarının funksiyalarının pozulmaması, lazımı miqdarda qida qəbulunun olması və bütün çeşidləri təmin edən makro və mikro elementləri qəbul etməlidir.
“Ramazanda da insanlar qida miqdarını sahur və iftar vaxtına bölüşdürülmüş şəkildə qəbul etməlidirlər”.
Ayan Rzayeva