Son zamanlar sosial şəbəkələrdə gizli çəkiliş vasitəsilə uşaq sığınacaq evlərində uşaqlara qarşı şiddət hallarının şahidi oluruq. Belə hadisələrdən biri də Bakı şəhərinin Xətai rayonu, 3 saylı uşaq evində baş verib. Orada qalan uşaqlardan biri iddia edib ki, müəssisədə uşaqlara quru çörək verirlər.

3 saylı uşaq evinin rəhbəri Məhbubə Hüseynova isə 17 yaşlı Hacıyev Məhəmməd Eldəniz oğlunun səsləndirdiyi iddiaların əsassız olduğunu deyir.

Məsələ barədə Azərbaycan Uşaqlar Birliyinin sədri Kəmalə Ağazadə Ednews-a hadisə ilə bağlı münasibət bildirərkən qeyd edib ki, söhbət davranış pozuntusundan gedirsə bu tip uşaqların müəssisədə qalması digər uşaqlar üçün də təhlükədir:

“Sosial şəbəkələrdə bəzən fərqli yanaşmalar olur. Çox güman ki, belə videoların ortaya çıxmasında kiminsə marağı olub. Bizim müəssisədə də uşaqlar çoxdur. Polisə tutanda uşağı özünə bəraət qazanmaq üçün “telefon istəyirdim, azadlıq istəyirdim “deyə bilər. Bir çox hallarda davranış pozuntusu olan bu uşaqlar müəssisələrə gələndə nizam-intizam qaydalarına adaptasiya zamanı bir qədər narahatlıq keçirirlər. Söhbət davranış pozuntusundan gedirsə bu tip uşaqların müəssisədə qalması digər uşaqlar üçün də təhlükədir. Uşaq müəssisələrində hər şeyin ideal olduğunu deməzdim”.

K.Ağazadənin sözlərinə görə, sonuncu məsələdə uşağın qərəzi və psixi pozuntusu var. Müəssisə bunla bağlı düzgün məlumatı əvvəldən vermədikdə belə problemlər ortaya çıxır. 

“Bununla bağlı çox ciddi monitorinqlər aparılmalı, uşaqların hər biri qiymətləndirilməlidir. Zərərli vərdişləri olan yeniyetməni müəssisəyə yerləşdirdikdə hansı fəsadları olacağı danışılmalıdır. Bu gün biz sığınacaq olaraq ən ağır kateqoriyalı uşaqlarla işləyirik, zorakılığa məruz qalmış, cinayət qurbanları, zərərli vərdişin qurbanı olan, cinsi zorakılığa məruz qalan uşaqlar var. Bu uşaqlar da başqa müəssisəyə getdikdə bir çox problemlə qarşılaşır. Təəssüf ki, uşaq evlərində məskunlaşan uşaqların harada və necə yaşadığını hamı bilir. Amma əksər vaxtlar onların hansı şəraitdə yaşadığını bilmirik”.

Reyhan Hacıyeva 

• Tag:
• Bakıda uşaq sığınacaq evində onlara quru çörək verilir? – AÇIQLAMA