“Qəza orucları ramazan ayı ərəfəsində tutula bilməz”.
Bu fikirləri ilahiyyatçı Turan İrfan Ednews-a qəza orucları barədə danışarkən səsləndirib. O, qeyd edib ki, oruc Allaha xatir və onun dərgahında savaba nail olmaq üçün müəyyən müddət daxilində yemək və içməkdən imtina etməkdir.
Bəs, oruc pozulduqda onun kəffarəsi və qəzaları necə olur? Qəza orucları nə zaman tutulmalıdır?
Söhbət zamanı İlahiyyatçı müzakirə olunan məsələlərə də aydınlıq gətirib. O, qəza oruclarının nə zaman tutulması barədə də məlumat verib.
“Əksər din xadimləri qəza orucunun fasiləli olmasına icazə verir. Bu oruclar imkan olduqca, fürsət tapıldıqca tutulmalıdır. Bu kimlərə aiddir sualına gəlsək , orucu bilmədən pozanlar, xəstəliyi olanlar, südəmər körpəsi olan xanımlar və səfərdə oıanlara aiddir.
Əgər oruc bilərəkdən pozulubsa, 1 günə görə 60 gün tutmalıdır. Bu da təbii ki, ağır yükdür və çətindir. Yox əgər bir insan səhhətilə bağlı və ya üzürlü səbəbə görə oruc tuta bilmirsə, bu günlərin əvəzinə fitrə, zəkat verə bilər. Hər günə 3 kiloqrama yaxın müxtəlif ərzaq məhsulları dəyərində (əvvəl ki, zamanla buğda, arpa və s. xurma idi) fitrəsini fəqirlərə, ehtiyyacı olanlara yardım etməlidir. Bu yardım həm də ehtiyyacı olan ailələrə pul yardımı kimi də edilə bilər. Bunları kəffarə olaraq verə bilər. İmkanı olmayan insan isə Allahdan bağışlanma diləyə bilər”.
Kazımlı Rübabə