“Laçına qayıdacaq sakinlərin iş yerləri ilə bağlı problemi olmayacaq və artıq 7 müəssisəyə işə cəlb olunmasına start verilib”. 

 

Ednews  report.az-a istinadən xəbər verir ki, bunu “Böyük Qayıdış” proqramı üzrə baş koordinator Elnur Abdullayev deyib. 

 

"Onların demək olar ki, ştat cədvəli də tam hazırdır. Həmçinin digər müəssisələrdə də analoji işlər aparılıb. Sakinlərə heç bir qadağa yoxdur və onların müraciəti əsasında onların ixtisasına uyğun yönləndirmə işləri aparılır. Hazırda respublikamızın digər bölgələrində yaşayan sakinlərimizin ixtisasa uyğun olmayaraq digər işlərə cəlb edilməsi halları var və biz onlarla ilkin söhbətlərimizdə, onların ixtisaslarına uyğun işlərlə təmin olunmasını üstün sayırıq”, - E.Abdullayev qeyd edib. 

 

Onun sözlərinə görə, Laçına səfəri çərçivəsində Prezident İlham Əliyev Qorçu və Şəlvə kəndlərinin əsasını qoyub.

 

Eyni zamanda Laçına qayıdacaq sakinlərin sosial durumunun yaxşılaşdırılmasına dair dövlət proqramına əsasən iş yerlərinin açılması ilə bağlı öz tövsiyyə və tapşırıqlarını verib: 

 

"Hazırda dayandığımız məkan Laçının aqroparkı, yəni sənaye və istehsalat müəssisələri olan ərazisidir. Bu ərazidə Laçın sakinlərinin işlə təmin olunması üçün iri və xırda müəssisələrinin açılması nəzərdə tutulur. Aqroparkda artıq müəyyən işlər həyata keçirilib. Hazırda birinci mərhələ olaraq tikinti işləri bitmək üzrədir. Daha sonra avadanlıqların qurulması işləri aparılacaq. 

 

Ölkə başçısının iş yerlərinin daha da artırılması ilə bağlı tövsiyyə və tapşırıqları var. Düşünürəm ki, deyilən müddət ərzində bu məsələlər öz həllini tapacaq. Artıq bu gün Laçına qayıdacaq 200 nəfərdən çox sakin işlə təmin olunub". 

 

E.Abdullayev əlavə edib ki, Laçın Həkəri çayının kənarında yerləşdiyi üçün burada balıqçılıq təsərrüfatının yaradılması da nəzərdə tutulub:

 

"Nəticədə bu təsərrüfatda bir çox insanlar iş yerləri ilə təmin ediləcəklər".