Yasamalda yanan binanın sakinləri Mənzil Kommunal Təsərrüfat Birliyindən narazıdır.

Onlar televiziya kanallarından birinə bildiriblər ki, yanan binanın çardağında bomjlar qalırdı. Hər gecə orada toplaşıb nə isə yandırırdılar. Neçə dəfə sakinlərin onları qovmasına baxmayaraq, bu hallar təkrarlanıb.

Sakinlər onu da qeyd edib ki, binanın yanması səbəbləri arasında onun çardağında gecələyən bomjların ocaq qalaması ehtimalı mümkün görünür.

Bir müddətdir ki, hər gecə təkrarlanan hadisə ilə bağlı Yasamal rayonu Mənzil Kommunal Təsərrüfat Birliyinə müraciət etsələr də qurum tərəfindən heç bir tədbir görülməyib.

Vətəndaş şikayətinə laqeyd yanaşan qurum nəyə xidmət edir?

Məsələyə münasibət bildirən deputat Fazil Mustafa Ednews-a açıqlamasında qeyd edib ki, aidiyyatı qurumların problemli məsələlərə biganə qalması sonda bədbəxt hadisə ilə nəticələnir.

“Mənzil Məcəlləsinə əsasən “jek”lər ləğv olunub. Onlar qanunsuz fəaliyyət göstərir. Arayış almaq və digər məsələlər üçün bu qurumu saxlayırlar, amma onlara vəsait ayırılmır. Vətəndaşdan müxtəlif formalarda vəsait alaraq fəaliyyətini davam etdirirlər. Qanunsuz olsa da, reallıq budur. Mənzil Kommunal Təsərrüfat Birliyi isə rəsmi qurumdur. Baş verən yanğınla bağlı onları sorğulamaq lazımdır ki, niyə buna səbəb olan hadisələrə vaxtında müdaxilə edilməyib. Olduqca ciddi problemdir və həllini tapmalıdır. İdarəetmədə belə qarışıqlıqlar olanda hadisələrdə də məsuliyyət daşıyan olmur. Son hadisə də buna sübutlardan biridir”.   

Törə Zeynal