Xəbər verdiyimiz kimi, yazıçı Oğuz Ayvaz yazısında təklif edib ki, məscidlərdə azan Azərbaycan dilində səsləndirilsin. 

Təkliflə bağlı Ednews-a ilahiyyatçı Elşad Miri bildirdi ki, təklifdə qəbahətli heç nə görmür. 

“Hər kəsin öz fikri, düşüncəsi ola bilər. Bunu da hörmətlə qarşılayıram. Oğuz bəyin təklif etdiyi fikir yeni deyil. Atatürk Türkiyəsində də azan türk dilində səsləndirilib. Müəyyən etirazlarla bu fikrin qarşısı alınmağa çalışılsa da bir neçə il aktuallığını qoruyub. İslama gəldikdə isə Quranda namaza, cüməyə çağırdığınız zaman deyilir. Orada azan və yaxud da xüsusi çağırış forması təklif edilmir. Bununla bağlı əmr, tövsiyyə yoxdur. Bu sadəcə olaraq insanların yığışaraq məşvərət edərək insan səsi ilə insanları dəvət etməsi ilə təqdir olunub”. 

E.Miri qeyd etdi ki, bu günlərdə bəzi avropa ölkələrində azanların ərəb dilindən asılı olub-olmayaraq səsin kənara ucaldımlasını başqalarını narahat edir deyə icazə vermirlər: 

“Başqa tərəfdən onu deyə bilərəm ki, faktiki olaraq təəssüflər olsun ki, əksər məscidlərimizdə İranın azan forması hansısa bir fləşkartdan, səsyazı ilə oxunur. Bunun önünə keçmək lazımdır. Bu gün təklif edilən məsələ insanlarda dinə təlabat artırarsa bunda heç bir problem yoxdur”.