Şəkidə Mərkəzi Seçki Komissiyası Daxili İşlər Nazirliyi ilə birgə Azərbaycan Respublikası Prezidenti seçkiləri ilə əlaqədar polisin seçkilərdə xidməti fəaliyyətinin daha da təkmilləşdirilməsinə həsr olunan regional seminar-müşavirə keçirilib.

Ednews-un Şimal-qərb bürosunun məlumatına görə, seminar-müşavirədə Mərkəzi Seçki Komissiyasının və Daxili İşlər Nazirliyinin nümayəndələri, dairə seçki komissiyalarının sədrləri və polis şöbələrinin əməkdaşları iştirak ediblər.

Tədbiri Şəki Şəhər-Rayon Polis Şöbəsinin rəisi Elnur Həsənov açaraq qarşıdan gələn növbədənkənar Prezident seçkilərində polis əməkdaşlarının da üzərinə mühüm vəzifələr düşdüyünü, seçkiqabağı təşviqat dövründə iştirakçıların təhlükəsizliyinin təmin edilməsi, seçicilərlə görüşün keçirildiyi yerlərdə ictimai asayişin qorunması və təhlükəsizliyin təmin edilməsi üçün bütün zəruri tədbirlər görüldüyünü qeyd edib.

Tədbirdə çıxış edən Mərkəzi Seçki Komissiyasının üzvü Qabil Orucov seçki qanunvericiliyi, seçki komissiyalarının sistemi, seçki prosesi, onun mərhələləri və müddətləri, seçki komissiyaları və polis orqanlarının birgə fəaliyyətinin əsasları mövzularına toxunub. Sonra DİN-in Baş İctimai Təhlükəsizlik İdarəsinin nümayəndələri Sənan Əliyev və Oqtay Tağıyev seçki kampaniyası dövründə və seçkilərin keçirildiyi gün ictimai qaydanın təmin edilməsi ilə bağlı polis əməkdaşlarının hüquq və vəzifələri, seçkidən sonrakı dövrdə seçki bülletenlərinin və digər seçki sənədlərinin dairə və Mərkəzi Seçki Komissiyasına gətirilməsi zamanı təhlükəsizlik tədbirlərinin görülməsi mövzularında çıxışlar ediblər.

Həmçinin Mərkəzi Seçki Komissiyasının üzvü Tofiq Həsənov seçki subyektləri, onların hüquq və vəzifələri, seçki subyektlərinin fəaliyyətinə qanunsuz müdaxilənin yolverilməzliyi mövzularında danışıblar. Seminar müşavirəni ATƏT-in müşahidəçiləri iziləyib.

Sonda iştirakçıları maraqlandıran sualllar verilib, fikir mübadiləsi aparılıb.