Yanvarın 26-da Beynəlxalq Avrasiya Mətbuat Fondunda fevral 7-də Azərbaycanda keçiriləcək Prezident seçkilərində ölkə üzrə müşahidəçi kimi iştirak edəcək heyəti ilə növbəti görüşü keçirilib.
Ednews xəbər verir ki, BAMF-ın baş ofisində baş tutan görüşdə təşkilatın müstəqil müşahidəçi heyətinin bir hissəsi iştirak edib. BAMF prezidenti Umud Mirzəyev müşahidəçilərə növbədənkənar Prezident seçkiləri müşahidəçiləri üçün Mərkəzi Seçki Komissiyası tərəfindən hazırlanan “Müşahidəçilər üçün Yaddaş” kitabında qeyd edilən hüquq və vəzifləri haqqında geniş məlumat verib. Onun sözlərinə görə, bu günkü görüşümüzün məqsədi seçki qanunu ilə bağlı yaddaşımızı təzələməkdir:
“Yaddaş kitabçası Seçki Məcəlləsinin müddəaları və Mərkəzi Seçki Komissiyasının təsdiq etdiyi təlimat, izah, qayda və digər normativ xarakterli sənədlər əsasında tərtib olunub. Nəşrdə seçkilərə dair bir sıra əsas anlayışların izahı verilib, müşahidə aparılmasının prinsipləri əks olunub, habelə müşahidəçilərin hüquq və vəzifələri aydın şəkildə göstərilib”.
U.Mirzəyev yanvarın 25-də Tərtər Regional Peşə Təlim Mərkəzində görüşlə bağlı da danışıb:
“İndiyə kimi gördüyümüz işlərlə bağlı müzakirələr apardıq. Qeydiyyata alındığımız vaxtdan həm Bakıda, həm də regionlarda bir sıra addımlar atmış, tədbirlər həyata keçirmişik. Müşahidəçilərimizin əksəriyyəti seçki dairələrində qeydiyyatdan keçib. Ən qısa vaxtda da bütün müşahidəçilərin qeydiyyat prosesi başa çatacaq”.
U.Mirzəyev seçki günü BAMF-ın müşahidəçilik fəaliyyətinin vahid bir mərkəzdən koordinasiya olunacağını deyib:
“Seçki günü müşahidəçilərimiz tərəfindən mütəmadi olaraq obyektiv məlumatlar toplanacaq və yayılacaq. Sonda isə Prezident seçkisi ilə bağlı yekun hesabat hazırlanacaq. Bu yekun hesabat beynəlxalq təşkilatlara da göndəriləcək”- deyə bildirib.
Qeyd edək ki, BAMF-ın müşahidəyə cəlb etdiyi əməkdaşların heç birinin siyasi mənsubiyyəti yoxdur.
Xatırladaq ki, “Müşahidəçilər üçün yaddaş kitabçası” Azərbaycan Respublikası Seçki Məcəlləsinin müddəaları, Seçki Məcəlləsinin tətbiq edilməsi barədə müvafiq fərman, eləcə də Azərbaycan Respublikası Prezidentinin 2005-ci il 11 may və 25 oktyabr tarixli sərəncamları, Mərkəzi Seçki Komissiyasının qəbul etdiyi Təlimat, İzah və Qaydalar əsasında hazırlanmışdır.
Oğuz
