Sosial şəbəkələrdə müəyyən istifadəçilər var ki, artıq onlar qeyri-etik davranışları ilə gündəmdə olmağı bacarırlar. Onlar övladlarını, bəzən azyaşlı uşaqlarını da canlı yayımlara çıxararaq öz əməllərinə alət edirlər. Belə hallar isə balacaların tərbiyəsinə mənfi təsir göstərməklə yanaşı, həm də cəmiyyətdə qıcıq yaradır.

Elə isə problemdən çıxış yolu nədir? Bu şəxslərin cəzalandırılması üçün hansı nəzarət mexanizmi var? Qonşu ölkələrdə olduğu kimi, Azərbaycanda da yeni bir qurum - Əxlaq polisi yaradıla bilərmi?

Mövzu ilə bağlı millət vəkili Sabir Rüstəmxanlı Ednews-a açıqlamasında bildirdi ki, ölkənin taleyi ilə bağlı bir çox məsələlər Milli Məclisdə müzakirə edilə bilər. Onun sözlərinə görə, məsələlərin qəbul olunub-olunmayacağını deyə bilməz:

"Hər halda Daxili İşlər Nazirliyinin azyaşlı uşaqlarla məşğul olan bir bölməsi var. Polis bu sahə ilə məşğul olur. Məsələ odur ki, bu sahədə obyektiv iş aparılmır deyə maraqlanmaq lazımdır. Ümumi olaraq deyim ki, əxlaq məsələsi təkcə polislə həll olunan deyil. Sosial mediada mentalitetimizə zidd olan o qədər şeylər olur ki... Heç bir millətdə bu qədər tərbiyəsiz yazılar, açıq-saçıq söyüşlər, ailə zorakılıqları ilə bağlı paylaşımlar yolxucu xəstəlik kimi yayılır. Bütün bunlar bizi düşündürməlidir. Qarşısını almaq üçün müvafiq tədbirlər həyata keçirməliyik".

Deputat hesab edir ki, Azərbaycanda Əxlaq polisi yaradılsa belə bu məsələlər həll yolunu tapmayacaq:

"Bu məsələ ümumi olaraq cəmiyyətin problemidir. Cəmiyyət bu yolu, prosesi keçməlidir. İctimai qınaq olmalıdır. Ailə, məktəb, təhsil qınağı olmalıdır. Hər şeyi polisin üzərinə atmaq doğru deyil."

Oğuz