“Sağlam dondurma sağlam qida zəncirində mühafizə olunub istehlakçılara təqdim olunan dondurmalardır. Burada qida zəncirinin əvvəlində yəni istehsalatda iş sonrası avadanlıqların düzgün yuyulması və dezinfeksiyası şərtdir. Əks halda qida zəhərlənməsi qaçılmazdır”.
Bu fikirləri Ednews-a qida məsələləri üzrə mütəxəssis ekspert Ağa Salamov danışıb.
“Çünki dondurma süd məhsulundan hazırlandığı üçün riskli qidalara daxildir və düzgün dezinfeksiya olunmayan avadanlıqlardan çarpaz çirklənmə nəticəsində məhsulda bulaşma baş verir. Dondurmalar soyuq qida zəncirində -18 dərəcə soyuducu ilə təchiz olunmuş maşınlarda daşınmalıdır. Marketlərdə isə dondurmalar -18 dərəcə soyuducularda mühafizə olunması şərtdir. Burada market inzibatçılarının da üzərinə düşən vəzifə, dondurucunun qapağının açıq olmaması və mütəmadi nəzarəti gücləndirməkdir.
Belə ki,bəzən istehlakçılar soyuducudan dondurma alarkən soyuducuların qapağını açıq qoyurlar. Bu zaman isti hava kütləsi dondurucuya daxil olur və dondurmalar əriyir. Nəzərinizə çatdıraq istəyirəm ki,bir dəfə donu açılıb, ikinci dəfə dondurulan dondurmalar təhlükəlidir və qida zəhərlənməsinə yol açır. Bu generator ilə təmin olunmayan müəssisələrə də aiddir. Elektrikin getməyi nəticəsində də soyuducularda temperatur dəyişir ki, buda dondurma ilə yanaşı başqa riskli məhsulların donunun açılmasına səbəb olur”.
Ekspert qeyd edir ki, donu açılmış dondurmaları necə bilmək olar?
“Əgər dondurma qablaşdırması deformasiyaya uğrayıbsa və ya ağızda buz kristalları hiss olunursa, bu cür dondurmalardan uzaq olmaq lazımdır. Bəzən soyuducunun ən alt qatında qalan dondurmaların vaxtı keçmiş olur. Buna diqqət etmək üçün isə, istehlakçılar mütləq dondurmaların son istifadə tarixinə nəzər salmalıdırlar”.
Aynurə İsmayıl
