"Vaşinqton və Tehran arasındakı gərginlik İraqın Amerika Birləşmiş Ştatları ilə əməkdaşlığına birbaşa təsir göstərməməlidir. Bağdad başqa dövlətlərin geosiyasi qarşıdurmasının girovuna çevrilmədən, yalnız öz milli maraqlarından çıxış etməlidir".
Politoloq Samir Hümbətov bunu EDnews-a açıqlamasında bildirib.
Ekspertin sözlərinə görə, İraq əhalisinin əksəriyyətinin şiələrdən ibarət olması, Bağdad və Tehran arasında sıx dini, tarixi və mədəni bağların mövcudluğu o demək deyil ki, İraq rəhbərliyi İranın xarici siyasi kursunu kor-koranə təkrarlamağa borcludur.
S.Hümbətov qeyd edib ki, hər bir suveren dövlət öz inkişaf vektorunu müstəqil şəkildə müəyyən edir:
“Əgər İraqın addımları İranın milli təhlükəsizliyinə birbaşa təhlükə yaratmırsa, onda Bağdadın ikitərəfli tərəfdaşlıq çərçivəsində Vaşinqtonla münasibətlərini gücləndirməsi qonşu dövlətlər tərəfindən mənfi qarşılanmamalıdır. İraq həm Tehran, həm də ABŞ ilə eyni vaxtda konstruktiv dialoq saxlamaq hüququna malikdir”.
Politoloqun fikrincə, Yaxın Şərq ölkələri üçün hazırda üçüncü tərəflərin qlobal münaqişələrinə cəlb olunmaq deyil, öz praqmatizmlərinə əsaslanaraq hərəkət etmək son dərəcə vacibdir.
Sonda Samir Hümbətov vurğulayıb ki, Yaxın Şərq regionunda mürəkkəb geosiyasi vəziyyətin davam etdiyi bir şəraitdə məhz balanslaşdırılmış, çoxvektorlu və praqmatik xarici siyasət daxili sabitliyi və təhlükəsizliyi təmin etmək üçün yeganə etibarlı vasitədir.
