İspaniya La Liqasının ikinci turunda ötən mövsümün çempionu "Barselona" öz meydanında "Real Betis"i qəbul edib.
Eurasia Diary xəbər verir ki, bu mövsüm "Kamp-Nou"da ilk oyununu keçirən Kataloniya klubu azarkeşlərə gözəl oyun nümayiş etdirib.
Oyunda hesab 15-ci dəqiqədə açılıb. "Betis"in oyunçusu Nabil Fekir "Barsa"nın qapısına yol tapıb. Matçın 41-ci dəqiqəsində Antuan Qrizman "Barselona" formasında "Kamp Nou"da ilk qolunu vuraraq hesabı bərabərləşdirib. Komandalar fasiləyə 1-1 hesablı bərabərliklə yollanıblar.
Oyunun ikinci hissəsinin 5-ci dəqiqəsində Qrizman özünün və komandasının ikinci qolunu vurub. "Barselona"nın heyətində 56-cı dəqiqədə Karles Perez, 60-cı dəqiqədə Jordi Alba, 77-ci dəqiqədə isə Arturo Vidal fərqləniblər. Matçın 79-cu dəqiqəsində Loren Moron "Betis"in ikinci qolunu Ter Ştegenin qoruduğu qapıdan keçirib.
Beləliklə, "Barselona" "Betis"ə böyük hesabla qalib gəlib - 5-2.
Qeyd edək ki, "Barselona"nın hücumçuları Lionel Messi və Luis Suarez zədəli olduqlarından bu oyunu tribunadan izləyiblər.
