Xəbər verdiyimiz kimi “Qarabağ” Avropa Liqasının ikinci turunda Fransanın “Nant” klubun 3-0 hesabı ilə darmadağın etdi.
UEFA “Qarabağ”ın görüşdən öncə rəsmi sükut elan olunması ilə bağlı müraciətini müsbət cavablandırmasa da, fanatlar özləri belə addım atdılar. Sentyabrın 13-də başlayan döyüşlər zamanı şəhid olduğu açıqlanan 71 hərbçinin xatirəsi yad edilib.
UEFA-nın şəhidlərimiz üçün 1 dəqiqəlik sükuta icazə verməməsi sosial şəbəkələrdə və ictimaiyyətdə müzakirələrə və tənqidlərə səbəb olub.
Ednews mövzunu diqqətdə saxlayaraq ictimai şəxslərin münasibətini öyrənib.
Millət vəkili Fazil Mustafa:
“Şəhidlərin anılması UEFA səviyyəsində olsaydı yaxşı ənənə olardı. Ancaq azarkeşlər özləri bunu etdilər. Bu elə onlara əsl cavab oldu”.
Azərbaycan Yazıçılar Birliyinin sədir müavini Rəşad Məcid:
“UEFA-nın bu barədə bəzi sərt qərarları var. Xüsusən siyasi çalarları olan məsələlərdə. Əslinə qalsa yaxşı hal deyil. Yəqin ki, qurumun daxili qərarıdır. Onun qarşılığı olaraq “Qarabağ” fanatlarının 1 dəqiqəlik sükutu özləri elan etməsi çox müsbət hadisə oldu. Ən yaxşı cavab isə şübhəsiz “Qarabağ”ın böyük hesabla qələbəsi oldu. Qurban Qurbanovun da dediyi ki, bu qələbə əsgərlərimizə, şəhidlərimizin xatirəsinə böyük ehtiram nümunəsi oldu”.
Əməkdar jurnalist Aydın Bağırov:
“UEFA-nın belə bir qərar verəcəyini gözləyirdim. Adətən qurum hərbi münaqişələri futbola aid etmir. Çalışır ki, mümkün qədər siyasi məsələlərdən uzaq olsun. Bu mənada Azərbaycanın məlum xahişi yetirilsəydi, “Pünik” klubunun Konferans Liqasındakı oyununda 1 dəqiqəlik sükut tətbiq edilərdi. Çünki Ermənistan tərəfi də xeyli itki verib. UEFA belə məsələlərə qarışmır, bu təkcə Azərbaycan və Ermənistan məsələsi deyil. Ümumi avropa təzyiqləri olmadığı müddətdə çalışır uzaq dursun. Qurumun özünə sərf edən siyasi qərarları da olur. Xüsusi olaraq bu faktı qeyd etmək istəyirəm ki, UEFA icazə verməsə belə azarkeşlərimizin təşəbbüsü ilə matç başlayana yaxın 1 dəqiqəlik sükutla şəhidlərimiz yad edildi. Allah şəhidlərimizə rəhmət etsin”.
"İdman TV"nin direktoru Rövşən Binnətli:
"Nant" ilə görüşün bir dəqiqəlik sükutla başlanması barədə "Qarabağ"ın təklifinə UEFA-nın müsbət yanaşmamasını bəlkə də anlayışla qarşılamaq olardı. Əgər Avropa futbol təşkilatı müraciətlərə ikili standartlarla yanaşmasa idi. Çünki cəmi 1 gün əvvəl UEFA kraliça II Yelizavetanın xatirəsinin anılmasına icazə vermişdi, həm də daha nüfuzlu Çempionlar Liqası turnirində. Ağdam klubunun müraciətinə müsbət cavab verilməməsi məsələnin futbola aid olmaması ilə izah edilmişdi. Həmin məntiqlə kraliçanın da vəfatının futbolla əlaqəsi yoxdur. Bu cür hallar isə qitə qurumu olsa da, əslində, dünya futbolunun əsas ruporu sayılan UEFA-ya, təşkilatın fəaliyyətinin obyektivliyinə getdikcə azalan inamı, etibarı bir qədər də azaldır”.