“NTD-nin bir çox çempionluğu var, lakin bu kubok komandamızın tarixində xüsusi yer tutacaq.”

“EDnews” xəbər verir ki, bunu Azərbaycan Kubokunun finalında “Gəncə”ni məğlub edən “NTD” klubunun baş məşqçisi Tahir Baxşıyev deyib.

Mütəxəssis Azərbaycan Basketbol Federasiyasının mətbuat xidmətinə açıqlamasında bu qələbənin çətin və önəmli olduğunu vurğulayıb:

 “Mövsüm bizim üçün asan keçmirdi. Xüsusilə Murad Babayevin kubok oyunlarında olmaması müəyyən çətinliklər yaratdı və biz rotasiya etmək məcburiyyətində qaldıq. Gənc oyunçularımız çox yaxşı çıxış etdilər, xüsusilə də Oğuzxan Quliyev etimadı doğrultdu. Hüseyn Məmmədov da “Neftçi” ilə yarımfinalda əla oyun nümayiş etdirdi. Bütün komandamı təbrik edirəm! Biz bu qələbə üçün çox çalışmışdıq və məqsədimizə birlikdə nail olduq. İndi bu uğuru qeyd edib, qarşıdakı çempionata hazırlaşmalıyıq.”

Baxşıyev Azərbaycan Kubokunda öncəki illərdə də uğura çox yaxın olduqlarını qeyd edib:

 “Federasiyaya bizə yaradılan şərait üçün təşəkkür edirəm. İki il əvvəl finalda məğlub olmuşduq, ötən il isə yarımfinalda dayandıq. Lakin bu dəfə məqsədimizə çatdıq və qalib gəldik. Bütün komandamı bir daha təbrik edirəm.”

Qeyd edək ki, bu gün Bakı İdman Sarayında keçirilən final oyununda “NTD” komandası “Gəncə” üzərində 81:72 hesablı qələbə qazanaraq Azərbaycan Kubokunun sahibi olub.

Şəms Qasımlı // EDnews