BMT Təhlükəsizlik Şurası Şimali Koreyaya qarşı sanksiyaları genişləndirib. APA TV-nin məlumatına görə, Təhlükəsizlik Şurasının üzvləri ABŞ tərəfindən hazırlanan qətnaməni yekdilliklə dəstəkləyiblər.
Qərarla KXDR-dən tekstil malları almaq qadağan edilir, qaz kondensatı tədarükünə embarqo qoyulur, həmçinin ölkəyə xam neftin idxalı məhdudlaşdırılır.
Qeyd edək ki, əvvəl rəsmi Vaşinqton həmçinin Şimali Koreyaya qarşı neft embarqosunun qoyulması, Kim Çen İnin aktivlərinin dondurulması və onun xaricə səfərinin qadağan edilməsini təklif edirdi.
Sentyabrın 2-də Şimali Koreya qitələrarası ballistik raketlər üçün nəzərdə tutulmuş hidrogen döyüş başlığını uğurla sınaqdan keçirdiyini bəyan edib. İki gün sonra ABŞ, Cənubi Koreya, Yaponiya, Böyük Britaniya və Fransanın təklifi ilə BMT Təhlükəsizlik Şurasının təcili iclası keçirilib.