Dünyanın bir çox ölkəsi misli görünməmiş COVID-19 koronovirus böhranı ilə mü­ba­rizəni davam etdirdiyi bir zamanda zorla didərgin salınma halları artmaqdadır və hazırda bəşəriyyətin bir faizindən çoxuna təsir göstərir ki, bunlar da münaqişələrdən, təqiblərdən və ictimai asayişi ciddi surətdə pozan hadisələrdən qaçmaqdan savayı seçimi olmayan və evlərinə qayıda bilməyən insanlardır.  Qlobal miqyasda köçürülməyə məruz qalmış insanların dünya tarixində qeydə alın­mış ən yüksək həddə -79.5 milyona çatdığı bir məqamda, Azərbaycan Respublikası Hö­ku­mə­ti və Birləşmiş Millətlər Təşkilatının Qaçqınlar üzrə Ali Komissarlığı (BMT QAK) BMT QAK-ın mandatı altında olan təxminən 2,000 qaçqın və sığınacaq axtaran şəxs üçün yerli inteqrasiya şəraitinin yaxşılaşdırılması istiqamətində birgə fəaliyyətlərini davam etdirir.

2019-cu ilin dekabr ayında baş tutan Qlobal Qaçqın Forumunda qaçqınların qanuni məşğulluğunun və əmək bazarına çıxışının asanlaşdırılması Azərbaycan nümayəndə he­yəti tərəfindən götürülən mühüm bir öhdəlik və dünya qaçqınları və onlara ev sahibliyi edən ölkələr və icmalarla həmrəyliyin qurulmasında mühüm mərhələ olmuşdur. Qlobal Qaç­qın Forumundan sonrakı aylar ərzində Azərbaycan Respublikasının Dövlət Miqrasiya Xid­məti öhdəliyin icrasını təmin etmək məqsədi ilə Əmək Nazirliyi və digər dövlət qurumları ilə iş aparmışdır. 20 iyunda qeyd edilən Beynəlxalq Qaçqın Günü ərəfəsində əldə edilən böyük nailliyyət ondan ibarət olmuşdur ki, indi Azərbaycanda olan qaçqın və sığınacaq axtaran şəxslər fərdi eyniləşdirmə nömrələri üçün müraciət edə və əmək müqavilələrini qeydiyyata aldıra bilərlər.

 “Azərbaycan hökuməti BMT QAK-ın himayəsində olan sığınacaq axtaran şəxslərin və qaçqınların qanuni məşğulluğunu asanlaşdırılmaq və qanuni əmək bazarına çıxış imkanlarını yaxşılaşdırmaq üçün mühüm addımlar atmış və Dövlət Miqrasiya Xidmətinin Əmək və Əhalinin Sosial Müdafiəsi Nazirliyi ilə bu yaxınlarda birgə həyata keçirdiyi tədbirlər bu şəxslərin əmək hüquqlarını tam təmin etmişdir.”,- deyə Azərbaycan Respublikası Dövlət Miqrasiya Xidmətinin rəisi Vüsal Hüseynov bildirib.

 “Xoşbəxtlikdən, Hökumət bu qaçqınların yalnız qeyri-rəsmi məşğulluq və humanitar yardımlara güvənmək əvəzinə özlərini təmin etmələrinə və vergi ödəmələrinə imkan verəcək qanuni məşğulluğa çıxış məsələsini həll edir. Bu, inkluzivlik və inteqrasiya yolunda irəliyə doğru böyük bir addım olacaqdır",- deyə BMT QAK-ın Azərbaycan Respublikasındakı nümayəndəsi Guido Ambroso bildirib. 

Ötən illər ərzində səmərəli əməkdaşlıq, texniki dəstək və potensialın artırılması fəaliyyətləri nəticəsində milli sığınacaq prosedurlarında beynəlxalq standartlara uyğun bir sıra pozitiv irəliləyişlər baş vermişdir ki, bu da qaçqınların himayə olunmasında və onlar üçün uzunmüddətli həll yollarının təmin edilməsində Hökumətin mühüm rolunu bir daha vurğulayır.

EDNews.net