Avropanın ən böyük miqrant düşərgəsi Moriada, çərşənbə günü erkən saatlarda yanğınlar baş verib. Hadisə şahidinin verdiyi məlumata görə, Yunanıstanın Lesbos adasındakı sıxlıq olan ərazidə yerləşən qaçqın düşərgəsi yanaraq külə dönüb. Bu barədə Eurasia Diary CNN-ə istinadən xəbər verir.
Xilasetmə qrupları, normadan altı dəfə çox, təqribən 13 min insanın yaşadığı, 2200 nəfərlik tutuma malik düşərgədəki yanğının qarşısını almağa çalışır.
İndiyədək xəsarət alanlar barədə məlumat verilməyib. Səlahiyyətlilər hələ də dəyən zərərin miqyasını qiymətləndirir. Fotoqraf Corc Mutafis, Yunanıstanın Mega telekanalına, düşərgənin "tamamilə məhv olduğunu" söyləyib.
Mutafis, "Moria düşərgəsi artıq mövcud deyil. Düşərgə tamamilə məhv oldu. Konteynerlər və çadırlar tamamilə məhv oldu. Yanğın artıq söndürülüb. Çox sayda miqrant və qaçqın indi düşərgəyə qayıdıb əşyalarını axtarır", deyə bildirib.
Yunanistan səlahiyyətlilərinin verdiyi açıqlamaya görə, yanğının səbəbi bilinmir. Bu həftənin əvvəlində 35 nəfərin Covid-19 testi müsbət çıxdıqdan sonra düşərgə bağlanıb.
Yerli mətbuat yanğınların bilərəkdən başladıldığını iddia edib.
Hadisə yerində olan alman xeyriyyəçi qrupu, çərşənbə axşamı gecəsi düşərgədə karantin tədbirləri ilə əlaqədar etirazın başladığını söyləyib.
