Polşa Belarusla sərhəddə respublikanı qeyri-qanuni miqrant axınından qorumaq üçün nəzərdə tutulmuş beş metr hündürlükdə hasarın tikintisinə başlayıb.
Ednews xəbər verir ki, gözlənildiyi kimi, 186 kilometr (km) uzunluğunda və 400 milyon dollar dəyərində olan hasarın tikintisi iyunda başa çatacaq.
Belarusla sərhəddə hasarın çəkilməsi qərarını Polşa hakimiyyəti ötən ilin payızında başlayan miqrasiya böhranı fonunda qəbul edib. Noyabrın 8-də Yaxın Şərq ölkələrindən olan bir neçə min insan Belarus tərəfdən Polşa sərhədinə yaxınlaşaraq ölkəyə daxil olmağa çalışıb.
Sonra bir neçə min hərbçi və polis su şırnaqları, gözyaşardıcı qazdan istifadə etməklə miqrantların girişini dayandıra bilib. Polşa səlahiyyətlilərinin bildirdiyinə görə, köçkünlər gecə saatlarında yüzlərlə insandan ibarət kiçik qruplar halında tikanlı məftilləri kəsərək, təhlükəsizlik qüvvələrinə daş ataraq, sərhədi keçməyə cəhd göstəriblər. Əksər miqrantlar saxlanılaraq Belarusa geri göndərilib, bəziləri isə Polşada qalıb. Onlardan bir çoxu Polşaya sığınacaq üçün müraciət edib.
Ümumilikdə, 2021-ci ildə miqrantların Belarusdan Polşaya qanunsuz yollarla daxil olması üçün 40 minə yaxın cəhd qeydə alınıb. Öncəki il isə sərhədi keçmək istəyənlərin sayı cəmi 122 nəfər olub. Bu vəziyyətdən çıxış yolu kimi Polşa hakimiyyəti hündür hasarın tikintisinə başlayıb. Dörd yerdə eyni vaxtda tikilən yeni hasarın hündürlüyü 5,5 metrə çatacaq. Hasarlar polad dirəklər və beton plitələr ilə örtüləcək.
Mütəxəssislərin hesablamalarına görə, ümumi tikinti üçün 50 min ton polad lazım olunacaq. Gələcəkdə hasarın müasir müşahidə avadanlığı, o cümlədən kameralar, gecəgörmə cihazları və hərəkət sensorları ilə təchiz edilməsi planlaşdırılır.
Tikinti üçün vəsait Polşa büdcəsindən ayrılır. Oxşar maneələr Baltikyanı ölkələrdə, Böyük Britaniya, Xorvatiya, Sloveniya, Serbiya, Macarıstan və Bolqarıstanda mövcuddur.
Hasarın tikintisinə nəzarət edən qurum ölkənin sərhəd mühafizəsidir.