İşğal altındakı İordan çayının qərb sahilindəki fələstinlilər son illərin ən böyük təxliyyəsi ilə üzləşiblər.
Ednews Al Jazeera-ya istinadən xəbər verir ki, təxminən 1200 fələstinlinin yaşadığı Masafer Yatta bölgəsində bir çox ev sökülür. Digər tərəfdən, bölgədə yəhudi köçkünlərin də sayı artmaqdadır.
İsrail bu ərazini “hərbi poliqon” elan edib. İsrail Ali Məhkəməsi də may ayında bu iddianı təsdiqləməsi nəticəsində bölgədə gərginlik artıb.
Əgər planlaşdırıldığı kimi davam edərsə, bölgədə ilin ən böyük kütləvi evakuasiyası baş verə bilər.
BBC-yə müsahibə verən fələstinlilər regionda baş verən proseslərdən narahatdırlar və özləri üçün gələcək görə bilmədiklərini deyirlər.
İsrail tikintiyə icazə vermədiyi evlərin “qanunsuz” olduğunu bildirərək artıq söküntü işlərinə başlayıb.
Yaşayış məntəqələri məsələsi isə İsraillə beynəlxalq ictimaiyyət arasında uzun müddətdir müzakirə olunur.
Qeyd edək ki, 1967-ci il işğalından sonra İordan çayının qərb sahilində və Şərqi Qüdsdə İsrailin qurduğu qəsəbələrdə yüz minlərlə yəhudi yaşayır.
Birləşmiş Millətlər Təşkilatının Təhlükəsizlik Şurasının 2334 saylı qətnaməsi "İsraili Şərqi Qüds də daxil olmaqla işğal olunmuş Fələstin ərazilərində bütün məskunlaşma fəaliyyətlərini dərhal və tamamilə dayandırmağa" çağırır.
Nəzrin Beydiyeva
