Son dönəmlər Azərbaycan və Amerika Birləşmiş Ştatları arasında gərginlik yaranıb. Gərginliyin yaranmasına səbəb kimi Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri üzrə şöbəsinin müdiri Hikmət Hacıyevin Şuşada jurnalistlərə verdiyi açıqlama olub. Açıqlamada o, ABŞ və Fransa səfirlərinin Qarabağa edilən səfərlərə qatılmamasını Azərbaycanın ərazi bütövlüyünə hörmət etməməsi kimi qiymətləndirib:
“ABŞ və Fransa səfirləri dəfələrlə dəvət olunmalarına baxmayaraq, Şuşaya səfər etməkdən nümayişkaranə şəkildə imtina edirlər. Bu, onların Azərbaycanın ərazi bütövlüyünə hörmət etməməsi kimi qiymətləndirilməlidir”.
Səfirliyin sözçüsü isə Hikmət Hacıyeva cavab olaraq ABŞ-ın davamlı dialoq, davamlı əlaqə vasitəsilə, o cümlədən yüksək səviyyələrdə, uzunmüddətli və hərtərəfli sülhə kömək etmək üçün mümkün olan hər şeyin həll ediləcəyinə inandığını deyib.
“Daha əvvəl dediyimiz kimi, Azərbaycanın müstəqilliyi və suverenliyinin ABŞ-dan böyük dəstəkçisi yoxdur. Amerika Birləşmiş Ştatları Səfirliyinin əməkdaşları Ağdam, Zəngilan və Füzuli də daxil olmaqla Azərbaycanın bütün bölgələrinə geniş şəkildə səfərlər ediblər və etməkdə davam edirlər. Səfirliyin əməkdaşları təhlükəsizlik, səhiyyə, enerji və iqtisadi inkişaf kimi mühüm məsələlərdə Azərbaycanla əlaqə qurmaq üçün ölkənin bütün bölgələrinə səfərlər edir”.
ReAl partiyasının sədri İlqar Məmmədov isə yaşanan gərginliyi öz “Facebook” səhifəsində fərqli qiymətləndirib. O, yaşanan gərginliyi Azərbaycanla ABŞ-ın Rusiyanı aldatması olaraq adlandırıb:
“ABŞ və Azərbaycan arasında diplomatik qalmaqalın məqsədlərindən biri Emənistan-Azərbaycan danışıqlarının tədricən Moskvadan Brüsselə köç etməsinə Rusiyanın cavabını çaşdırmaqdır. Rusiya baxır görür ki, bir tərəfdən Qərb danışıqlarda aparıcı rolu ondan oğurlayır, digər tərəfdən isə Bakı ilə Qərb arasında məhz elə bu danışıqlarla bağlı qalmaqal yaşanır. Qalır çaş-baş. Xüsusilə də Baş nazirimizin gedib Avrasiya İqtisadi İttifaqı toplantısında müşahidəçi qismində oturması fonunda.
Bu, diplomatik oyunumuzun, yuxarıda qeyd etdiyim kimi, Bakıya və Qərbə xidmət edən məqsədidir. Amma iradəmizə zidd olaraq onun İrəvana da xidmət edəcək məqsədləri ola bilər, onlardan qorunmalıyıq”.
Məsələ ilə bağlı “Ednews”a danışan millət vəkili Aqil Abbas İlqar Məmmədovun fikirlərinə qatılmayıb:
“O elə fikirləşirsə bu onun fikridir. Ancaq mən helə fikirləşmirəm. Elə bir şey yoxdur. Azərbaycan ABŞ-la birləşib Rusiyanı niyə aldatsın? Azərbaycana qarşı sərt mövqe tutan Amerikadır, Rusiya deyil ki? ABŞ ATƏT-i diriltmək istəyir, Şuşaya getməkdən imtina edir. Bu deyilənlər də İlqar Məmmədovun mövqeyidir. Bu sualı İlqar Məmmədova verin. Onun yerinə mən cavab verməliyəm?”
Əbülfət Baxşəli
