Artıq bir aydan çoxdur ki, rus sülhməramlılarının müvəqqəti nəzarəti altında olan ərazilərimizdə qanunsuz erməni silahlı birləşmələri müxtəlif istiqamətlərdən Azərbaycan ordusunun mövqelərini mütəmadi atəşə tuturlar.
Məqsədyönlü şəkildə təxribatlar törətməklə yanaşı erməni separatçıları sülhməramlıların onlara yaratdıqları şərait sayəsində silahlanır və yeni hərbi mövqelər yaradırlar.
İctimaiyyətimizdə ciddi narahatçılıq doğuran bu məsələyə bir çoxları ilə bərabər partiya sədrləri də münasibət bildirib.
Partiya sədrləri Ednews –a açıqlamalarında Azərbaycan ordusu tərəfindən Qarabağda növbəti dəmir yumruq əməliyyatlarının həyata keçirilməsini zəruri hesab ediblər. Onların sözlərinə görə, bu dəfəki anti-terror tədbirləri erməni təxribatlarına birdəfəlik son qoymalıdır.
Azərbaycan Milli İstiqlal Partiyasının sədri Arzuxan Əlizadə qeyd edib ki, üçtərəfli bəyanatın 4-cü maddəsinin yerinə yetirilməməsi nəticəsində sülhməramlıların məsuliyyət zonasında Ermənistan ordusunun qalıqları və separatçı ünsürlər artıq intensiv şəkildə təxribatlar törədirlər.
“Bu istiqamətdə Azərbaycan ordusu üç dəfə adekvat addımlar atıb. Qisas, Fərrux və Qətiyyətli cavab əməliyyatları ilə ordumuzun bütün prosesləri qarşısını almaq iqtidarında olduğunu göstərib. Milli İstiqlal Partiyası olaraq mətbuata və ictimaiyyətə açıqlamalarımızda Azərbaycan Silahlı Qüvvələrinin öz suveren ərazilərində hər hansı anti- terror əməliyyatlarını dəstəkləyəcəyimizi bildirmişik. Bu hüququ Azərbaycandan heç kəs ala bilməz. Bu beynəlxalq hüquqla tənzimlənən məsələdir. Həmin erməni terrorçuları mütləq zərərsizləşdirilməlidirlər. Hədəfimizdə Xankəndi, Xocəvənd və Xocalını nəzarətə götürmək olmalıdır. Əgər erməni təxribatlarının qarşısı alınmazsa, çox ağır fəsadlarla üzləşəcəyik”.
Azərbaycan Xalq Partiyasının sədri Pənah Hüseynin sözlərinə görə, Azərbaycanın ərazi bütövlüyünə və suverenliyinə təhdid olan qondarma rejim və onun qanunsuz silahlıları tezliklə çökdürülməlidirlər.
“Qarabağda hərbisizləşdirilmənin aparılması, separatçı ünsürlərin məhv edilməsi və həmin ərazi üzərində suverenliyin bərpası dövlət təhlükəsizlik orqanlarının konstitusiya öhdəliyidir. Ərazilərimizdə separatizmin tam kökünün kəsilməsi üçün hərbi, siyasi və diplomatik səviyyədə ciddi tədbirlər görülməlidir. Növbəti əməliyyatlarda Xankəndinə girməliyik”.
Ağ Partiyanın sədri Tural Abbaslı Laçın dəhlizinin bağlanmasına çağırıb.
“Üçtərəfli bəyanata uyğun olaraq rus sülhməramlıları ərazilərimizdə qanunsuz silahlı birləşmələri tərkisilah edərək sakit və sabit mühit yaratmalı idi. Bundan sonra isə məcburi köçkünlərimiz öz doğma torpaqlarına qayıtmalı idilər. Lakin nə silahlı birləşmələr ləğv olunub, nə məcburi köçkünlər qayıdıb, nə də Laçın dəhlizindən silah daşınmasının qarşısı alınıb. Ermənilər bu dəhliz vasitəsilə ərazilərimizə külli miqdarda mina gətirirlər. Bu da hərbiçilərimizin və mülki insanlarımızın həyatına təhlükə törədir. Bütün bunları nəzərə alanda Azərbaycanın özünü müdafiə hüququ var. Xocalı, Xankəndi və Xocəvənd üzərində suverenliyin bərpası istiqamətində anti-terror əməliyyatları həyata keçirilməli və erməni silahlıları məhv edilməlidir. Laçın yolu da bağlanmalıdır”.
Milli Dövlətçilik Partiyasının sədri Nemət Pənahlı Qarabağda ermənilərin son təxribatlarını Rusiyanın regionda gesosiyasi maraqları ilə əlaqələndirib. Onun sözlərinə görə, ərazilərimizdə sülhməramlılar birbaşa Rusiyanın bölgədə mövqeyini möhkəmləndirir.
“Dırnaqarası rus sülhməramlı qüvvələri erməni silahlılarını qoruyub saxlayırlar və onların təxribat törətməsinə münbit şərait yaradırlar. Laçın dəhlizi ilə Ermənistandan Qarabağa silah-sursat gətirərək qanunsuz silahlı birləşmələrini silahlandırırlar və onları bizə qarşı hazırlayırlar. Əgər bu özbaşnalıqlar davam edərsə, ağır faciələr və fəsadlarla qarşılaşacağıq. Azərbaycan ordusu birmənalı şəkildə buna son qoymalıdır. Azərbaycan 44 günlük müharibədə qətiyyət göstərərək 30 illik erməni işğalına son qoyub. İndi də həmin qətiyyət nümayiş etdirilməlidir. Xankəndi daxil olmaqla ermənilərin yaşadığı ərazilər ordumuzun nəzarətinə keçməlidir”.
Müasir Müsavat Partiyasının sədri Hafiz Haciyev də həmkarları ilə eyni fikirləri bölüşüb.
“Qarabağda təcili şəkildə çox ciddi anti-terror əməliyyatları keçirilməlidir. Bu əməliyyatlar çərçivəsində erməni separatçıları və digər qanunsuz silahlı birləşmələri məhv edilməlidir. Orada bir dənə erməni terrorçusu qalmamalıdır. Eyni zamanda Xankəndində Azərbaycan bayrağı qaldırılmalı və bu şəhərinin meri təyin edilməlidir. Ermənilərin nazları ilə çox da oynamamalıyıq. Onların vaxt udmasına imkan verməməliyik”.
Yunis Abdullayev
.png)
