Ednew xəbər verir ki, BMT-nin Baş katibi Antonio Quterreş Beynəlxalq Mina Xəbərdarlığı və Mina Fəaliyyətinə Yardım Günü ilə bağlı müraciət ünvanlayıb.
“Silahlı münaqişələrin xaosu yaratdığı ərazilərdə yaşayan milyonlarla insan, xüsusən də qadınlar və uşaqlar üçün atılan hər addım onları təhlükə qarşısında qoya bilər.
Döyüşlər bitdikdən sonra belə, münaqişələr çox vaxt qorxulu miras qoyur: insanların yaşadığı yerləri çirkləndirmiş mina və partlayıcı sursatlar. Yollar və əkin sahələri minalananda, partlamamış hərbi sursatlar köçkünlərin geri qayıtması üçün təhlükə törədəndə və uşaqlar partlayan cismlər tapıb onlarla oynayanda sülh heç bir təhlükəsizlik təminatı vermir.
Birləşmiş Millətlər Təşkilatının Minalardan Təmizləmə Xidməti bu ölümcül silahları aradan qaldırmaq, milli hakimiyyət orqanlarını dəstəkləmək, eləcə də evlərə, məktəblərə, xəstəxanalara və fermerlərin tarlalarına təhlükəsiz girişi təmin etmək üçün tərəfdaşları bir araya toplayır. Xidmət həmçinin Qara Dəniz Taxıl Təşəbbüsünün layihəsini və Ukrayna limanlarından taxıl və gübrənin təhlükəsiz ixracını dəstəkləyib.
Bununla belə, insanları minalardan qorumaq üçün daha geniş qlobal səylər vacibdir.
Mən üzv dövlətləri Piyada Əleyhinə Minaların Qadağası Konvensiyasını, Kaset tipli sursatlar haqqında Konvensiyanı və Müəyyən Adi Silahlar haqqında Konvensiyanı ratifikasiya etməyə və tam şəkildə həyata keçirməyə çağırıram.
Gəlin, bu Beynəlxalq Gündə bu ölüm cihazlarının təhlükəsinə son qoymaq üçün hərəkətə keçək, icmalara dəstək olaq və insanların təhlükəsiz şəraitdə geri qayıtmasına və həyatlarını yenidən qurmalarına kömək edək”.