Tailandın paytaxtı Banqkokdan 10 kilometr məsafədə yerləşən sahilyanı Ban Xun Samut Çin kəndi okena sularına qərq olmaq təhlükəsi ilə üz-üzədir.
Ednews Skynews-a istinadən xəbər verir ki, iqlim dəyişikliyi nəticəsində okeanda suyun səviyyəsi qalxıb. Ekoloji problemlər səbəbilə sakinlər evlərini qoyub köçməyə məcbur olublar. Hazırda kənddə qalanların sayı 200 nəfəri keçmir. Kənddə dirəklər üzərində qurulmuş yeganə məktəbin şagirdləri hər səhər məktəblərinin uçmaması üçün dua edir.
Kənd başçısının sözlərinə görə, 20-ci əsrin 60-cı illərindən başlayaraq iki kilometrlik ərazi dəniz suları ilə yuyularaq yox olub. Suyun üzünə çıxan köhnə elektrik dirəklərindən başqa keçmişdə burada yaşayışın olduğunu göstərən bir işarə yoxdur. Eroziyanın ilk qurbanı buddist məbədi olub. Məbədin ətrafını indi mavi sular əhatə edir.
Tailand əhalisinin təxminən 17%-i, yəni 11 milyon insan sahilyanı ərazilərdə yaşayır. Onların əsas gəlir mənbəyi balıqçılıq və turizmdir.
Birləşmiş Millətlər Təşkilatının məlumatıan görə, 1900-cü ildən bu yana dəniz səviyyəsi qlobal miqyasda artıb. Xüsusilə Cənub-Şərqi Asiya kimi bəzi tropik bölgələrdə suyun səviyyəsi 15-25 santimetr yüksəlib.
Proqnozlara görə, istiləşmə davam edərsə, əsrin sonuna qədər Sakit və Hind okeanlarının adaları ətrafında suyun səviyyəsi əlavə bir metr də yüksələ bilər.
Dublin Universitetinin ətraf mühit siyasəti üzrə professoru Denni Marksın fikrincə uzaq Ban Xun Samut Çin kəndinin hazırki vəziyyəti iqlim dəyişikliyi səbəbilə yaxın gələcəkdə dünyanı gözləyən fəlakətə sübutdur.
Kənddəki eroziyaya iqlim dəyişikliyi ilə yanaşı, ətraf mühitin düzgün idarə edilməməsi də səbəb olub.
Törə Zeynallı