ABŞ Şimali Koreyanın CRISPR gen redaktə üsulundan istifadə edərək bioloji silah istehsal etməyə çalışdığını iddia edib.

Ednews sozcu.com-a istinadən xəbər verir ki, ABŞ Dövlət Departamentinin 2024-cü il üçün "Silahlara Nəzarət, Yayılmaması və Silahsızlanma Sazişləri və Öhdəlikləri" adlı hesabatı dərc olunub.

Hesabatda Şimali Koreyanın CRISPR kimi genlərin redaktə və modifikasiyasına imkan verən texnologiyalardan istifadə etdiyi və bioloji silahlar istehsal etdiyi barədə xəbərdarlıq edilib . Şimali Koreyanın avadanlıq və materialların tədarükü üçün digər ölkələrlə əməkdaşlıq etdiyi iddia edilən hesabatda Pxenyan rəhbərliyinin bioloji silahların istehsalını və istifadəsini qadağan edən Bioloji Silahlar Konvensiyasına tərəf olduğu xatırladılıb.

ABŞ-da yerləşən Beynəlxalq Münasibətlər Şurasının (CFR) 2023-cü il hesabatında da Şimali Koreyanın kimyəvi və bioloji silahlara malik olduğu iddia edilib.

Böyük Britaniya tərəfindən hazırlanmış, 1972-ci ildə imzalanmış və 1975-ci ildə qüvvəyə minmiş ilk çoxtərəfli Bioloji Silahlar Konvensiyası bakterioloji və zəhərli silahların hazırlanmasını, istehsalını və saxlanmasını qadağan edir və bu silahların məhv edilməsini nəzərdə tutur.

Bioloji silahların istehsalını qadağan edən konvensiyaya qoşulan ölkələr arasında Türkiyə də daxil olmaqla 183 ölkə var.

Xəyal Ramiz