ABŞ iqtisadi artımı sürətləndirmək üçün dünyanın ən pis humanitar böhranlarından birinin yaşandığı Yəmən hökuməti ilə 5 illik yardım müqaviləsi imzalayıb.

Ednews-un məlumatına əsasən ABŞ-ın Yəməndəki səfirliyinin saytında dərc edilən bəyanatda, “Yəmənin Planlaşdırma və Beynəlxalq Əməkdaşlıq naziri Vaid Abdullah Bazib ABŞ Beynəlxalq İnkişaf Agentliyinin ölkə direktoru və baş inkişaf müşaviri Kimberli Bell ilə 5 illik yardım müqaviləsi imzalayıb. 

Açıqlamada, USAİD tərəfindən verilən inkişaf yardımının Yəməndə iqtisadi inkişafın sürətləndirilməsi, su, səhiyyə və təhsil xidmətlərinə çıxışın yaxşılaşdırılması və idarəçiliyin gücləndirilməsi məsələlərini əhatə etdiyi bildirilib, lakin Yəməndə gözlənilən artımla bağlı məlumat verilməyib.

Bildirilir ki, dünyanın ən kasıb ölkələrindən biri olan Yəməndə hökumət qüvvələri ilə İranın dəstəklədiyi husilər arasında 10 ilə yaxındır davam edən vətəndaş müharibəsi səbəbindən humanitar böhran dəhşətli həddə çatıb. Yəməndə İranın dəstəklədiyi husilər 2014-cü ilin sentyabrından paytaxt Səna və bəzi bölgələrə nəzarət edir. Səudiyyə Ərəbistanının rəhbərlik etdiyi koalisiya qüvvələri 2015-ci ilin mart ayından husilərə qarşı Yəmən hökumətinə dəstək verir.

Birləşmiş Millətlər Təşkilatının Qaçqınlar üzrə Ali Komissarlığının hesabatlarına görə, Yəmən xalqının 73 faizi (təxminən 23,4 milyon nəfər) vətəndaş müharibəsi səbəbindən humanitar yardıma ehtiyac duyur. 4,3 milyon insan didərgin düşüb. Ölkədəki münaqişələr nəticəsində 13 mindən çoxu mülki şəxs olmaqla 377 min insan həyatını itirib.

Xəyal Ramiz