Dünya şöhrətli ispaniyalı fotoqraf Qervasio Sançez Fernandez Kolumbiyada səfərdədir.

O, bu barədə Ednews-a açıqlamasında deyib. 

“20 il əvvəl mina qurbanı olan Monika Paola Ardilla adlı gənc qadının hekayəsini bilmək üçün Kolumbiyaya yollandım. Monika Paola Ardila 19 dekabr 1995-ci ildə anadan olub. Qəza 2003-cü il fevralın 20-də Kolumbiyanın Bolivar bölgəsinin cənubunda yerləşən San Pablo bələdiyyəsində baş verib.

Minanın partlaması nəticəsində Monika görmə qabiliyyətini, bir əlini itirib. Bundan başqa digər əlində də zədələr yaranıb. Qəza 7 yaşında olarkən baş verib. Hazırda onun 28 yaşı var. Bu il oğlu da dünyaya gəlib.  Bu yeni mərhələ onun üçün yeni başlanğıcı təmsil edir. Ümid edirəm ki, o, həyatının yeni mərhələsində çox daha yaxşı olacaq. 

Mən onunla 8 yaşı olanda tanış olmuşam və o vaxtdan onun hekayəsini izləyirəm. Monikanın hekayəsi Kolumbiyadakı işimin əsas hissəsidir”.

Xatırladaq ki, Qervasio Sançez Fernandez ötən ay Azərbaycanda səfərdə olub. Fotoqraf işğaldan azad edilən ərazilərdə, o cümlədən mina qurbanları ilə görüşlər keçirib. İspan fotoqraf Ağdam, Tərtər, Goranboy, Füzuli rayonlarında, o cümlədən Şuşa, Laçın, Zəngilan səfərlərində olub. Fotoqraf səfərləri zamanı 20-dən çox mina qurbanları ilə fərdi görüşlər keçirib. Bundan əlavə o, Qarabağı qarış-qarış gəzərək, insanlarla söhbətlər edib, onların həyat hekayələrini dinləyib. İşğaldan azad edilən ərazilərdən yenidən qurma işləri ilə yaxından tanış olub. Eyni zamanda Beynəlxalq Avrasiya Mətbuat Fondunun mina qadın komandası ilə görüş keçirib.

Qeyd edək ki, Qervasio Sançezin fotoları ağ-qara üslubda, müharibənin iki üzünü göstərir.

Mikayıl