Rusiyanın gündəmində parlamentin yuxarı palatası olan Federasiya Şurasında çalışan senatorun parlamentin qapısında FSB tərəfindən saxlanılması əməliyyatı var.

Ednews “kommersant” qəzaetinə istinadən xəbər verir ki, Tula vilayətinin senatoru Dmitri Savelyev biznes tərəfdaşını öldürməyə cəhd ittihamı ilə Moskvada saxlanılıb.
 
Rusiya Federasiyasının baş prokuroru İqor Krasnov senator Savelyevin toxunulmazlığının götürülməsi üçün Federasiya Şurasından razılıq aldıqdan sonra Savelyev parlamentin iclasını tərk edərkən həbs edilib.
 
İstintaq sənədlərinə görə, hadisələr 2023-cü ildə baş verib. İddialara görə, Savelyev şəxsi düşmənçilik zəminində biznes ortağı İonovu (tam adı açıqlanmır) öldürməyi planlaşdırıb. İonov şirkətin pulunu mənimsədiyinə görə həbsdə idi. Savelyevin qətli təşkil etmək üçün vasitəçilərdən istifadə edərək 100 min dollar ödədiyi bildirilir. Lakin işə götürülmüş keçmiş FSB əməkdaşı sui-qəsd planını səlahiyyətli orqanlara çatdırıb və əməliyyat FSB-nin nəzarəti altında davam edib.
 
Əməliyyat zamanı Savelyevə guya sui-qəsdin həyata keçirildiyini göstərən uydurma sübutlar təqdim edilib. Bundan sonra Savelyev əvvəlcədən razılaşdırılmış məbləği ödədi. İstintaq zamanı Savelyevin müavini onun 10 milyon rublu 100 min dollara çevirdiyini və bu pulların qətlin təşkilində istifadə olunduğunu təsdiqləyib. Vasitəçilər sui-qəsdin pulunu təhvil verdiklərini və Savelyevin cinayətdə əli olduğunu da etiraf ediblər.
 
İstintaq faylına cinayət ortaqlarının danışıqlarının audio yazıları və Savelyevin sui-qəsdlə əlaqəsini sübut edən mesajlar da var. Bu dəlil Savelyevin cinayəti törətməyə hazırlaşdığına dair şübhələri gücləndirdi. Yaxın günlərdə Savelyevin həbsi üçün Moskva Basmaniy Məhkəməsinə ərizə veriləcək.

Xəyal