Türkiyə prezidentinin kommunikasiya şöbəsinin rəhbəri Fəxrəddin Altun bildirib ki, Türkiyə hakimiyyəti Kiprdə iki dövlətin mövcudluğunu tanımağa çağırır. Onun sözlərinə görə, Ankara adadakı mübahisəli ərazilər probleminin həllinə "daha 60 il sərf etmək” niyyətində deyil.
EDnews "Anadolu” agentliyinə istinadən xəbər verir ki, bu barədə Altun Yunanıstanın "Ta Nea” qəzetinə müsahibəsində danışıb.
"Reallıqla üzləşməyin vaxtıdır: Kiprdə iki ayrı xalq və iki ayrı dövlət var. Nə Kipr türkləri, nə də Türkiyə daha 60 ili boş yerə sərf etmək istəmir”, - Altun bildirib.
Xatırladaq ki, 1974-cü ildə Kipr türkləri və yunanlar arasında baş verən qarşıdurma nəticəsində Kipr şimal və cənub hissələrə bölünüb. Çevriliş nəticəsində adada Yunanıstanın dəstəklədiyi hərbi hökumət hakimiyyətə gəlib. Buna cavab olaraq türk qoşunları Kiprin şimal hissəsinə yerləşiblər. 1975-ci ildə Şimali Kipr Türk Cümhuriyyətinin (KKTC) müstəqilliyi elan edilib, lakin beynəlxalq ictimaiyyət tərəfindən tanınmayıb.
