İlon Maskın bioqrafı Set Abramson məşhur milyarderin psixi sağlamlığının ciddi şəkildə pisləşdiyini və bunun ABŞ üçün təhlükə yarada biləcəyini iddia edib. 

"EDnyus" xəbər verir ki, bu barədə o, özünün sosial şəbəkə hesabında paylaşım edib.

Set Abramson bildirib ki, Mask son iki il ərzində həm internetdəki davranışı, həm də şəxsi həyatındakı açıqlamalarına görə, "zehni sabitliyini itirmək üzrədir". Bioqrafın sözlərinə görə, Mask psixi problemlərini açıq şəkildə etiraf edib və ağır stress, eləcə də narkotik maddələrdən istifadəsi ilə bağlı məlumatlar yayıb.

"Əgər Mask yalnız adi bir biznesmen olsaydı, bu vəziyyət belə bir narahatlıq yaratmazdı. Amma o, texnologiya və kosmos sahəsində strateji əhəmiyyətli təsisatlar idarə edir, bu isə vəziyyəti olduqca təhlükəli edir. Üstəlik, onun prezidentliyə iddiaları bu narahatlığı daha da artırır", deyə Abramson vurğulayıb.

Abramson hazırkı Amerika administrasiyasını İlon Maskın təsirini məhdudlaşdırmaq üçün dərhal tədbirlər görməyə çağırıb. Onun təklif etdiyi tədbirlər bunlardır:

* Maskla mövcud olan bütün dövlət müqavilələrinin ləğv edilməsi;
* DOGE kriptovalyutası ilə bağlı təşəbbüslərin bloklanması üçün hüquqi addımlar;
* Milyarderin fəaliyyətləri ilə bağlı yeni araşdırmaların başlanması.
 

O əlavə edib: "Əgər bu xəbərdarlıqlar nəzərə alınmazsa və davranışları nəzarətsiz qalarsa, gələcəkdə baş verəcəklərə görə yalnız Mask və onun tərəfdarları deyil, həm də bu xəbərdarlıqları qulaqardına vuranlar məsuliyyət daşıyacaq".

İlon Mask artıq bir neçə ölkədə daxili siyasi proseslərə müdaxilə etməkdə ittiham olunur. Xüsusilə, Almaniyada Maskın sağçı AfD partiyasına dəstək çağırışı seçkilərə müdaxilə kimi qiymətləndirilib. Bundan başqa, o, Böyük Britaniyada hökumət əleyhinə sərt bəyanatlar səsləndirib və hətta baş nazir Kir Starmerin həbs olunmasını təklif edib.

Böyük Britaniyada üç böyük siyasi partiyanın liderləri Maskın siyasi müdaxilələrini tənqid edib və ABŞ-da onun tərəfdarlarını bu mövzunu yenidən düşünməyə çağırıb.