Minlərlə tərəfdar bazar günü Nepalın keçmiş kralını paytaxt Katmanduda qarşıladı və ləğv edilmiş monarxiyanın bərpa olunmasını, həmçinin Hinduizmin yenidən dövlət dini elan edilməsini tələb etdi.
Təxminən 10,000 kral tərəfdarı, onun Qərbi Nepala səfərindən qayıtması münasibətilə Katmandunun ticarət mərkəzinin və beynəlxalq hava limanının əsas girişini bağladı.
“Kral üçün kral sarayını boşaldın!", "Geri qayıt, kral!", "Ölkəni xilas et!", "Yaşasın sevimli kralımız!", "Biz monarxiya istəyirik!" – izdihamın şüarları bunlar idi.
Sərnişinlər hava limanına getmək və oradan çıxmaq üçün kifayət qədər uzun yolu piyada getməyə məcbur oldular. Onlarla çevik polis əməkdaşı etirazçıların hava limanına daxil olmasına mane oldu,amma bu zaman xoşbəxtlikdən heç bir zorakılıq halı qeydə alınmadı.
2006-cı ildə genişmiqyaslı küçə etirazları Qanendranı avtoritar idarəçiliyindən imtina etməyə məcbur etmişdi. İki il sonra isə parlament monarxiyanı ləğv etmək üçün səs verdi və Qanendra kral sarayını tərk edərək adi vətəndaş kimi yaşamağa başladı.
Lakin hazırki vəziyyətdə bir çox nepallı respublikadan narazıdır və onun siyasi sabitlik gətirə bilmədiyini, həmçinin iqtisadi çətinliklərə və geniş yayılmış korrupsiyaya görə məsuliyyət daşıdığını hesab edirlər.
2008-ci ildə monarxiya ləğv edildikdən sonra Nepal 13 hökumət dəyişib.
Mitinq iştirakçıları ölkənin daha da pisləşməsinin qarşısını almaq üçün siyasi sistemdə dəyişiklik olacağına ümid etdiklərini bildiriblər.
“Biz bura kralımıza tam dəstəyimizi göstərmək və onu yenidən kral taxtına qaytarmaq üçün toplaşmışıq," – deyə 72 yaşlı Bahadur Bandari bildirib.
Minlərlə insan arasında 50 yaşlı dülgər Kəlraç Şreşta da var idi. O, 2006-cı ildə krala qarşı keçirilən etirazlarda iştirak edib, lakin fikrini dəyişib və indi monarxiyanı dəstəkləyir.
«Ölkədə baş verən ən pis şey geniş yayılmış korrupsiyadır və hakimiyyətdə olan bütün siyasətçilər ölkə üçün heç nə etmir," – deyə Şreşta bildirib:
“Mən monarxiyanı devirmək üçün keçirilən etirazlara qatılmışdım, çünki bunun ölkəyə kömək edəcəyini düşünürdüm. Lakin səhv etmişəm, çünki ölkə daha da pis vəziyyətə düşdü. Buna görə də fikrimi dəyişdim," – deyə o əlavə edib.
Qanendra monarxiyanın bərpası çağırışları ilə bağlı heç bir şərh verməyib.Keçmiş kralın artan dəstəyə baxmayaraq, dərhal hakimiyyətə qayıtmaq şansı azdır.
Xatırladaq ki, 2002-ci ildə qardaşı və ailəsi sarayda qətlə yetirildikdən sonra kral olmuşdu.2005-ci ilə qədər icraedici və siyasi səlahiyyətləri olmadan konstitusiya üzrə dövlət başçısı kimi hökm sürdü.Lakin o, mütləq hakimiyyəti ələ keçirəndə hökuməti və parlamenti buraxdı, siyasətçiləri və jurnalistləri həbs etdi, rabitəni kəsdi, fövqəladə vəziyyət elan etdi və ölkəni idarə etmək üçün ordudan istifadə etdi.
Mədinə Məmmədova // EDnews
