Bəşəriyyət bir çox güc mərkəzlərinin mövcudluğu ilə yeni dünya düzəninə doğru irəliləyir. Artıq nə birqütblü, nə də ikiqütblü dünya olacaq.

“EDnews” xəbər verir ki, bu barədə Türkiyə Böyük Millət Məclisinin (TBMM) sədri Numan Kurtulmuş Özbəkistana səfəri zamanı jurnalistlərlə söhbətində deyib.

Onun sözlərinə görə, Çin yaxın illərdə qlobal güc mərkəzlərindən birinə çevriləcək. Bununla yanaşı, Hindistan, Braziliya, Meksika və çəkisi artan Türkiyə də bu rola iddialıdır.

“Beynəlxalq münasibətlər sistemi gərginliklərin qarşısını almaqda acizdir”

Kurtulmuş bildirib ki, mövcud beynəlxalq münasibətlər sistemi artıq böhran və eskalasiya mərhələlərinin qarşısını ala bilmir:

 “Dünya birliyi üçün müəyyənləşdirilmiş qaydalar sadəcə kağız üzərində qalıb. Heç bir məcburetmə mexanizmi yoxdur”.

O, xüsusilə silahlanma yarışının yenidən başladığını vurğulayaraq, bunun fəsadlarını əvvəlcədən proqnozlaşdırmağın mümkün olmadığını bildirib.

“Türkiyənin diplomatik mövqeyi daha da əhəmiyyətlidir”

TBMM sədri ABŞ-nin keçmiş prezidenti Donald Trampın Avropanın təhlükəsizliyi ilə bağlı verdiyi açıqlamalara toxunaraq, Vaşinqtonun və NATO-nun bu məsuliyyəti üzərinə götürmək niyyətində olmadığını deyib.

Sonda Kurtulmuş vurğulayıb ki, ən doğru yol dialoq və diplomatiyadır:

 “Türkiyə hər zaman qarşılıqlı anlaşmaya əsaslanan, böhranların diplomatik yolla həllini təşviq edən yanaşmanı dəstəkləyib. Bu gün Ankaranın bu mövqeyi daha da aktuallaşır”.

Şəms Qasımlı // EDnews