Respublikaçı senator Lindsi Qremin iddiasına görə, İranda altı ədəd atom bombası hazırlamaq üçün yetərincə zənginləşdirilmiş uran var.

“EDnews” xəbər verir ki ,Lindsi Qrem bunu “Fox News” telekanalına müsahibəsində deyib.

“Tehran altı nüvə bombası hazırlamaq üçün kifayət qədər zənginləşdirilmiş urana sahibdir. Onlar nüvə silahından istifadə edərək ilk növbədə İsrailə, sonra isə bizə hücum edəcəklər”, - deyə respublikaçı senator bildirib.

Lindsi Qrem iddiası ilə bağlı heç bir sübut təqdim etməyib və məlumatın mənbəyini açıqlamayıb.

Bir müddət öncə ABŞ Silahlı Qüvvələrinin mərkəzi komandanlığının rəhbəri general Maykl Kurilla Tehranın nüvə silahı hazırlamaq barədə qərar qəbul etmədiyini söyləyib. Yanvarın ortalarında İran Prezidenti Məsud Pezeşkian “NBC News” telekanalına Tehranın nüvə silahı hazırlamaq məqsədi güdmədiyini açıqlayıb.

Bu arada, martın 7-də ABŞ Prezidenti Donald Tramp İranın ali lideri Ayətullah Əli Xameneiyə nüvə proqramı ilə bağlı danışıqlar aparmağı təklif edib. Tərəflər danışıqların birinci raundunu aprelin 12-də Omanda keçirmək barədə razılığa gəliblər.

Fatimə Mərdanlı // EDnews