Bu gün, aprelin 26-da Omanın paytaxtı Maskatda ABŞ və İran arasında texniki məsləhətləşmələrdən sonra yüksək səviyyəli dolayı danışıqların üçüncü mərhələsi start götürəcək.

“EDnews” xarici KİV-lərə istinadən  xəbər verir ki, görüşdə hər iki tərəfin mütəxəssisləri İranın nüvə proqramı ilə bağlı mümkün razılaşmanın detalları üzərində müzakirələr aparacaqlar.

Məlumatda bildirilir ki, siyasi səviyyədə aparılacaq danışıqlarda İran heyətinə xarici işlər naziri Abbas Ərakçi, ABŞ tərəfinə isə prezidentin xüsusi nümayəndəsi Stiven Uitkoff rəhbərlik edəcək.

Mütəxəssislər səviyyəsində aparılan müzakirələrdə isə ABŞ-ı Dövlət Departamentinin siyasi planlaşdırma direktoru Maykl Enton, İranı isə xarici işlər nazirinin müavinləri Məcid Təxt-Rəvançi və Kazem Qəribabadi təmsil edəcək.

Qeyd edək ki, ilkin olaraq ekspertlərin məsləhətləşməsi aprelin 23-də keçirilməli idi. Lakin ABŞ administrasiyası logistik səbəbləri əsas gətirərək, Oman vasitəsilə bu görüşün təxirə salınmasını istəyib. Məlumata görə, ABŞ nümayəndələrinin Qətər Baş naziri Şeyx Məhəmməd bin Əbdül Rəhman Əl Taninin Vaşinqton səfəri səbəbindən planları dəyişib.

Şəms Qasımlı // EDnews