Rusiya Federasiyası döyüş sursatlarının istehsalında NATO ölkələrini qabaqlayır və bu prosesi onlardan dəfələrlə sürətli həyata keçirir. 

EDnews xəbər verir ki, bu barədə NATO-nun baş katibi Mark Rütte Londonda Kral Beynəlxalq Münasibətlər İnstitutundakı çıxışı zamanı bildirib. Onun sözlərini "Suspilne” nəşri sitat gətirib.

"Döyüş sursatlarına gəlincə, Rusiya üç aya NATO ölkələrinin bir ilə istehsal etdiyindən çox istehsal edir”, – deyə Rutte bildirib.

O əlavə edib ki, Rusiya hərbi maşını dayanmaq əvəzinə sürətini artırır. Rütte qeyd edib ki, Rusiya hərbi potensialını fəal şəkildə bərpa edir və bu işdə ona Çin, İran və Şimali Koreya yardım göstərir. NATO baş katibi vurğulayıb ki, Moskva öz ordusunu modernləşdirmək üçün Çin texnologiyalarından istifadə edir.

"Gözlənilir ki, bu il Rusiya müdafiə sənayesi 1500 tank, 3000 zirehli texnika və 200 ədəd "İskəndər” raketi istehsal edəcək”, – deyə Rütte bildirib.

O, həmçinin qeyd edib ki, NATO nəzərə almalıdır: Rusiya yaxın beş il ərzində Alyansa qarşı təcavüzə başlamağa hazır ola bilər. Rüttenin sözlərinə görə, "Putin sülhə yox, qarşıdurmaya hazırlaşır”.

Eyni zamanda, Almaniyanın Silahlı Qüvvələr Təchizat İdarəsinin rəhbəri Annet Lenigk-Emden bildirib ki, Avropanın yenidən silahlanması üçün cəmi üç ili var, əks halda Rusiya ilə müharibə baş verəcək. Onun sözlərinə görə, Alman ordusunun yenidən silahlandırılması üçün dörd il deyil, daha az vaxt qalıb.

"2028-ci ilə qədər tam müdafiə hazırlığı üçün lazım olan hər şey alınmalıdır – əsgərlər yeni avadanlıqlarla təlim keçməlidir. İdarəmizdə bu işi görmək ruhu artıq mövcuddur. Biz bu texnikanı alacağıq! Bu, indi bizim şüarımızdır. Biz əməkdaşlarımıza öyrədirik ki, vaxtı qazanmaq üçün mümkün olan hallarda qərarları özləri versinlər”, – deyə o bildirib.

Mark Rütte həmçinin NATO ölkələrinin hərbi xərcləri niyə artırmalı olduqlarını izah edib. Bu xüsusda o, Almaniya müdafiə nazirinin fikirlərini sitat gətirib. Nazir qeyd edib ki, 2029-cu ilə qədər ruslar NATO-ya qarşı uğurlu hücum təşkil etmək iqtidarında ola bilərlər.

"Əgər indi hərəkətə keçməsək, növbəti üç il ərzində hər şey yaxşı olacaq, amma biz dərhal başlamalıyıq, əks halda 4-5 ildən sonra təhlükə ilə üz-üzə qalacağıq”, – deyə NATO baş katibi xəbərdarlıq edib.