BMT-nin Ərzaq və Kənd Təsərrüfatı Təşkilatı (FAO) kənd təsərrüfatında davamlı inkişafa töhfə vermək məqsədilə toxum sistemlərinin və bitki müxtəlifliyinin gücləndirilməsinə 2 milyard ABŞ dollarından çox vəsait ayırıb.

EDnews xəbər verir ki, Bu barədə FAO-nun baş direktoru Qu Dongyu qurumun Romada keçirilən 44-cü sessiyasında məlumat verib. O qeyd edib ki, bu investisiyalar 30-dan çox ölkəni əhatə edir və müxtəlif sahələrdə mühüm təşəbbüslərin reallaşdırılmasına şərait yaradıb.

Qu Dongyu əlavə edib ki, FAO və Beynəlxalq Bitki Mühafizəsi Konvensiyası (IPPC) tərəfindən hazırlanmış rəqəmsal fitosanitar sertifikatlaşdırma sistemi artıq 136 ölkədə tətbiq olunur. Bundan başqa, 60-dan çox ölkədə zərərvericilərlə mübarizə üzrə mütəxəssislərə təlimlər keçirilib və 50-dən çox ölkə təhlükəsiz gübrə və pestisid istifadəsindən faydalanmağa başlayıb.

FAO rəhbəri onu da bildirib ki, bu il Dünya Ərzaq Forumu çərçivəsində “Toxumdan Yeməyə” adlı Qlobal Sərgi təşkil olunacaq. Sərgi toxumun aqro-ərzaq dəyər zəncirindəki vacib yerini nümayiş etdirməyi hədəfləyir.

Qurum həmçinin “Əldən-Ələ” təşəbbüsü və İnvestisiya Mərkəzi vasitəsilə yoxsulluq, qida çatışmazlığı və bərabərsizliyin azaldılması məqsədilə hədəflənmiş investisiya proqramlarına start verib. Bu təşəbbüs sayəsində 2022-ci ildə 1,5 milyard dollar olan investisiya həcmi 2024-cü ildə 4,5 milyard dollara yüksəlib.

Şəms Qasımlı // EDnews