Məlum olduğu kimi, Qazaxıstanın Otar hərbi bazasında təşkil edilən snayper yarışında Azərbaycan hərbçiləri növbəti mərhələyə daxil olub, zəif nəticə göstərən Ermənistanın isə yarışı dayandırıb.
Hərbçilərimizin bu uğuru bütövlükdə ordumuzun Ermənistan Silahlı Qüvvələrindən peşəkarlıq baxımından əhəmiyyətli dərəcədə üstün olmasının növbəti nümunəsi kimi dəyərləndirilə bilərmi?
Tanınmış hərbi ekspert, ehtiyatda olan polkovnik Şair Ramaldanov ordumuzun digər yarış və tədbirlərdə də ciddi nəticələr göstərdiyinə diqqət çəkdi:
“Yalnız Qazaxıstanda keçirilən bu tədbirdə deyil, NATO dövlətlərinin keçridiyi tədbirlərdə, sülhməramlı qüvvələr çərçivəsindəki fəaliyyəti fonunda da Azəbaycan Silahlı Qüvvələri öz peşəkarlıqları ilə fərqlənirlər. Rusiyada tankçılar arasında keçirilən yarışlarda da Azərbaycan tankçıları erməni tankçılarından üstün oldular.
SQ-mizin peşəkarlığı xarici mütəxəssislər tərəfindən də yüksək qiymətləndirilir. Türkiyədəki təlim və tədbirlərdə də SQ-mizə yüksək qiymət verilib. Türkiyə SQ-nin nümayəndələri bizim əsgərlərin xidmətini görəndə, onlarla ünsiyyətdə olanda həmişə fərəh keçirir, ordumuzun döyüş əhval-ruhiyyəsinin yüksəkliyini qeyd edirlər.
Təbii ki, biz öz düşmənimizdən üstün olmalıyıq. Bizim qarşımızda mühüm bir vəzifə durub. Bu vəzifə isə Azərbaycan torpaqlarını işğaldan azad etməkdir. Bu səbəbdən də bizim Müdafiə Nazirliyinin rəhbərliyi də daim səngərlərdə, daim təlim meydanlarındadır. Hərbi hissələrimiz bir təlimdən çıxıb digər təlimə girirlər. Həm daxili, həm də xarici təlimlərdə aktiv iştirak edirlər. Dənizdə də bu təlimlərə qoşulmuşuq. Harda SQ-lər arasında yarış varsa, ölkəmizin SQ-ri məharət və həvəslə bu yarışda iştirak edirlər. Onlar bu yarışlarda həm də ona görə iştirak edirlər ki, özlərinə, öz peşəkarlıqlarına inanırlar. Biz bununla həm də düşmənə, eləcə də digər dövlətlərə göstəririk ki, Azərbaycan SQ-ri sadəcə yüksək texnika, silah gücünə görə diqqət çəkmir. Ölkəmizin SQ-rinin nümayəndələri həm də öz peşəkarlığı ilə güclüdür.
Hərbçilərimizin yarışlarda göstərdiyi nəticə ordumuzun durumunu, onun hazırlıq səviyyəsini göstərir. Bu onu göstərir ki, müdafiə nazirindən tutmuş əsgərə kimi “ali baş komandanın əmrini gözləyirik” ifadəsini boş yerə işlətmirlər. Müdafiə Nazirliyi döyüş hazırlığının yüksəldilməsinə daim diqqət yetirir, bu və digər məsələləri nəzarətdə saxlayır.
Bütün bunlar göstərir ki, ordumuz ona verilən istənilən tapşırığı yerinə yetirməyə qadirdir və peşəkarlığını mütəmadi surətdə artırır. Bu isə torpaqları işal altında olan ölkə olaraq Azərbaycan üçün olduqca vacibdir”.(moderator.az)
