Türkiyənin tarixində ən vacib seçkilərə artıq üç gün qaldı. Bazar günü Türkiyə parlamentar sistemdən prezident üsul idarəsinə keçəcək. Bir tərəfdə 16 ildir girdiyi bütün seçkilərdə qələbə çalan hazırkı prezident Rəcəb Tayyib Ərdoğanı dəstəkləyən Cümhur ittifaqı, digər tərəfdə isə seçkilərə xüsusi coşqu qatan Muharrem İncəni dəstəkləyən Millət ittifaqı... Açığı, əksər analitiklər iddia edirlər ki, məclis seçkilərində Cümhur ittifaqı, prezident seçkilərində də Rəcəb Tayyib Ərdoğan qalib gələcək. Ancaq, anket şirkətləri də analitiklərin fikrini təsdiq etmirlər. Türkiyədə hazırda iqtisadi vəziyyət ürəkaçan deyil. Milli valyutaları sürətlə ucuzlaşır, qiymətlər sürətlə artır. İnflyasiya isə durmadan yüksəlir. Xalq artıq əvvəlki kimi hazırkı hökuməti dəstəkləmir. Həm də Türkiyədə belə bir mif var. İstanbulda qalib gələn tərəf, Türkiyədə qalib gəlmiş hesab olunur. Referendum seçkilərində müxalifət tərəfi 3 böyük şəhərdə - İstanbul, Ankara və İzmir şəhərində qalib gəldilər. Hətta, o dövr Ərdoğanın populyarlığı indikindən qat-qat yüksək idi. Yəni, Cümhur ittifaqının işi elə də asan deyil. Partiya olaraq AKP bütün anket nəticələrində birinci partiya olaraq çıxır, lakin hazırkı sistemdə 50 faizdən artıq səs toplamaq lazımdır. Ona görə də AKP birinci çıxmasına baxmayaraq 50%-ə çata bilmir. Cümhur ittifaqında yer alan MHP və BBP ilə birlikdə 50% sərhəddini aşıb-aşmamağı qeyri-müəyyənliyini hələ də qoruyur. Cümhur İttifaqı ümidlərini prezident Rəcəb Tayyib Ərdoğanın populyarlığına bağlayıb. Çünki, o, axı "seçki ustası" adlandırılır. Amma, bu dəfə Ərdoğanın sağ seçicilərindən səs qopardacaq Meral Akşener və populyarlığı hər keçən gün daha da artan Muharrem İncə var.
Qısacası, əhəmiyyət və rəqabət baxımından Türkiyəni çox mühüm bir seçki gözləyir. Nəticələri nə olursa olsun, Türkiyə və bizim üçün xeyirli olsun. Azərbaycan-Türkiyə münasibətləri dünyada ikinci nümunəsi olmayan ikitərəfli münasibətlərdir. Burada dövlət çıxarlarından daha çox xalqların sıx münasibətlə bir-birinə bağlılığı əsasdır. İki dövlət arasındakı münasibətlərin inkişafında hər iki ölkə xalqının istək və arzuları nəzərə alınaraq strategiyalar həyata keçirilir. Yəni, iqtidarlar, hökumətlər dəyişsə belə Azərbaycan-Türkiyə münasibətlərinin inkişafı həmişə irəliyə doğru gedəcəkdir. Hər zaman həm Azərbaycanın, həm də Türkiyənin xarici siyasətində ilk sıranı Azərbaycan-Türkiyə münasibətləri, hər iki ölkənin problemləri prioritet təşkil edib. Hər halda, 24 iyundakı seçkilərin nəticəsindən asılı olmayaraq, Türkiyə ilə olan münasibətlərimiz inkişaf tempini qoruyacaq və sürətli addımlarla irəliləyəcək.
Ramiyə Məmmədova, politoloq, Qərbi-Kaspi Universitetinin dekanı
