Xəbər verdiyimiz kimi son günlərdə Dövlət Sərhəd Xidmətinin bir gün arayla iki hərbi qulluqçusu Azərbaycan-Ermənistan dövlət sərhəddinin Qazax istiqamətində Ermənistan Silahlı Qüvvələri tərəfindən açılan atəş nəticəsində şəhid olub. ( Orxan Nazim oğlu Paşazadə Eltun Elman oğlu Qarayev)
Bir gün arayla DSX-nın iki hərbi qulluqçusunun şəhid olması və bununla da sadəcə bu il qurumun şəhid olan əsgərlərinin sayının 4-ə yüksəlməsi ictimaiyyət tərəfindən birmənalı qarşılanmayıb. Ölkə vətəndaşları xüsusilə də sosial şəbəkələrdə ardıcıl gələn şəhid xəbərlərini müzakirə edir, Azərbaycan ictimaiyyəti ordudan düşmənə cavab zərbəsini gözləyir.
Məsələylə bağlı Qarabağ qazisi, istefada olan polkovnik-leytenant Nazim Bayram Ednews-a eksklüziv müsahibə verib.
- Nazim bəy Ermənistanla sərhəddə nə baş verir? Ardıcıl itkilər verməyimizin səbəbi nədir?
- Əvvəla, şəhid olan əsgərlərimizə Allahdan rəhmət diləyirəm. Son aylarda DSX regionda olduqca fəal iş aparır. Əsas məqsəd maksimum səviyyədə təhlükəsizliyi təmin etmək və düşmənin potensial təxribat hücumları əngəllməkdir. Ötən günlərdə baş verənlər barədə isə konkret bir şey demək olmaz, ancaq təxmin yürütmək olar. Məncə, ordumuz Qazax istiqamətində müxtəlif yollarla irəliləyib, ermənilərin strateji yollarını, obyektlərini nəzarətə götürməyə çalışır. Çünki məlum olduğu kimi bu ərazidə strateji yüksəkliklər düşmənin nəzarətindədir və bu durum regiondakı dinc vətəndaşlarımız üçün daim təhlükə doğurur. Ermənilər isə öz növbəsində snayperlərlə bunun qarşısını almağa cəhd göstərir.
- Bu versiya doğrudursa ermənilərin heç bir itki verməməsini, əvəzində isə ordumuzun ardıcıl iki əsgərinin şəhid olmasını DSX-nın uğursuz olması kimi dəyərləndirilə bilərmi?
Xeyr! DSX regionda sivil xalqın təhlükəsizliyinin təmin etmək nöqteyi-nəzərdən ciddi uğurlara nail olur. Orada hər şey qaydasında idi. Sadəcə ardıcıl şəhidlər verməyimiz durumu dəyişdi. İndi DSX düşmənə maksimum güclü zərbə vurmalıdır. Məni də itkilərimiz çox hiddətləndirir, dərhal, gecikmədən 10 qat misliylə cavab verilməlidir. Lakin bəzən ehtiyat və qətiyyətsizlik qorxaqlığa gətirib çıxarır. Amma mən nə olura olsun bir hərbçi kimi plana və əmrə üstünlük verirəm.
- DSX Ermənistanla sərhəddə ardıcıl itkilər verdiyi zaman cəbhədə nisbi sakitlik idi. Nə üçün ordumuz Qazaxdakı şəhidlərimizin qisasını cəbhədə düşməndən almır?
- Bunun cavabı çox bəsit və sadədir. Cəbhəyə nəzarət edən Müdafiə Nazirliyinə heç bir konkret əmr verilməyib. Əmrin verilməməsinin mahiyyəti odur ki, müəyyən irəliləmələrə cavab olaraq düşmən snayperlərdən istifadə edir və yavaş-yavaş sərhəddəki ərazilərə nəzarəti itirir. Belə bir zamanda gəginliyi cəbhəyə daşımaq doğru deyil. Ümumiyyətlə, bu mövzu barədə yekun fikrimi deyim, məncə, biz o qədər aciz deyilik ki, düşmən snayperi işləsin, biz susaq, bunu həzm edək. Mən rəhbərliyin konkret hərbi planının olduğunu düşünürəm.
- Son günlər Ermənistanla sərhəddə yaşanan hərbi aktivlik Qarabağ istiqamətində də müşahidə edilə bilərmi?
- İnşallah, bu il Qarabağda müharibə gözlənilir, mən buna inanıram. Xüsusilə də Qondarma rejimdəki prezident seçkilərindən sonra cəbhədə ordumuzun hərbi aktivliyinin artmasını proqnozlaşdırmaq olar.
Digər müsahibimiz istefada olan general Qabil Məmmədovsa ordumuzun ardıcıl itkilər verməsinin səbəbini müəyyən hərbi xətalarla əlaqələndirib:
“Məlumdur ki, kamuflyajdan canlı qüvvə və döyüş texnikasını düşmənin gözündən, müşahidəsindən yayındırmaq məqsədilə istifadə edilir. Bizim sərhədçilərimizin səhra geyiminə baxanda hər zaman düşünürəm ki, görəsən hansı relyefi əsaslara söykənərək bu rəngləri seçiblər? Axı, bu rənglər ərazi örtüyü ilə uyğun gəlmir və əksinə olaraq "göz qamaşdırır?!". Məncə, ardıcıl şəhidlər verməyimizin əsas səbəblərindən biri bu ola bilər ”.
Göründüyü kimi ekspertlər bu məsələdə fərqli düşünür. Ordumuz isə xalqımız kimi yumuruğunu sıxıb, döyüşə hazır durub. Şəhidlərimizin qisası hər hansı yolla olursa olsun alınmalıdır. Şəhidinin qanını yerdə qoyan, torpaqlarını işğaldan azad edə bilməyən bir ordunun dünya reytinqində neçənci yerdə durmasının və ya nə qədər güclü olmasının heç bir əhəmiyyəti yoxdur...
Nicat İsmayılov
