İyulun 12-də Ermənistan Azərbaycanla sərhədin Tovuz rayonu istiqamətində hücumlara başladı. Erməni təxribatları nəticəsində Azərbaycan biri general olmaqla 11 hərbçisini itirdi.
Tovuzdakı vəziyyət Dağlıq Qarabağ münaqişəsinin sülh yolu ilə həllinə böyük təhlükə yaradıb.
Amerikalı politoloq və yazar, eyni zamanda Birləşmiş Ştatların Mərkəzi Kəşfiyyat İdarəsinin (MKİ) və Dövlət Departamentinin keçmiş analitiki Pol A. Qobl mövcud qarşıdurmaya dair fikirlərini EDNews.net-lə bölüşüb.
Qeyd etmək lazımdır ki, silahlı qarşıdurma Qarabağ cəbhəsində deyil, sərhəddə başladı.
Amerikalı analitik hesab edir ki, Ermənistan bu hücumla Rusiyanın mövqeyini öyrənmək istədi.
"Ermənistan Rusiyanın hələ də əvvəlki mövqeyində qalmasına və Azərbaycanın daha böyük ordu ilə hücuma cavab verməsinə mane olacağına əmin olmaq istəyir", deyə o qeyd etdi.
Pol Qobl pərdəarxasında hər hansı geosiyasi səbəbin olduğunu istisna edir. O, həmçinin uzunmüddətli müharibə ehtimalının az olduğunu bildirib.
"Bunun necə baş verdiyini təsəvvür edə bilmirəm. Rusiya tezliklə bunun qarşısını almalı olduğunu anlayacaq".
Bundan əlavə siyasi təhlilçi bildirib ki, başqa güclər ən azı yaxın gələcəkdə prosesə qarışmaq niyyətində deyil.
"Azərbaycanın yüksək rütbəli zabitlərini itirməsi o deməkdir ki, yaxın gələcəkdə danışıqlarda nəyəsə nail olmaq mümkün olmayacaq. Azərbaycanlılar qətiyyətli mövqe tutmağı milli şərəf məsələsi olaraq görəcəklər", deyə Pol Qobl fikrini yekunlaşdırıb.
Ülvi Əhmədli