Bu il oktyabr ayının 31-də Gürcüstanda parlament seçkiləri keçiriləcək. Ölkənin siyasi sisteminin parlamentli respublika olduğunu nəzərə alsaq, o zaman seçkilərin əhəmiyyətini izah etməyə ehtiyac qalmır.

Bu seçkilərin ölkənin siyasi kursunda kifayət qədər önəmi var. Eurasia Diary seçkilərlə və nəticəsinin Gürcüstan-Azərbaycan əlaqələrinə təsiri ilə bağlı gürcü siyasi təhlilci Qiya Abaşidzenin fikirlərini alıb.

İlk öncə o, ölkədə baş nazir postunun hansı ki, parlament tərəfindən müəyyən edilir, xarici siyasətə təsir imkanlarına dair misal verib. Siyasi təhlilci pandemiyanın yaratdığı gərgin vəziyyəti izah edib.

“Müalicə strategiyası, vaksin və dəqiq proqnozların olmaması səbəbindən qlobal pandemiya dünya üçün ən böyük problemdir. Beləki, heç kim dünyanın gələcəyi , iqtisadi və sosial həyatı haqqında məlumatlı deyil. Bu, müəyyən addımlar atmağa və bu böhranı imkanlara çevirməyə çalışan Gürcüstan üçün də ən böyük problemdir”.

O, düşünür ki, yaranmış vəziyyətdə Gürcüstan hökuməti düzgün yanaşma sərgiləyə bilib.

“Baş nazir Giorgi Qaxariya və hakim komanda bu günə qədər böhranı idarə edib, aktiv xarici əlaqələri qoruyub. Gürcüstanın xarici tərəfdaşları, ölkənin COVID-19 ilə mübarizədə uğurlu səylərini yüksək qiymətləndiriblər. Gürcüstan beynəlxalq təşkilatlardan və Azərbaycan da daxil olmaqla dost ölkələrdən kifayət qədər yardım alıb. Bu yaxınlarda Prezident İlham Əliyev Heydər Əliyev adına Bakı Dərin Özüllər Zavodunda Abşeron yatağının dəniz əməliyyatları mərasimi üçün verdiyi reportajda Gürcüstanı "etibarlı tərəfdaş" adlandırıb”.

Politoloq müstəqillik illərində Gürcüstanın həmişə Azərbaycanla müsbət əlaqələr saxladığını söyləyib.

“Müstəqilliyini bərpa etdikdən sonra Gürcüstanın bütün hakim partiyaları qonşu tərəfdaş Azərbaycanla çox yaxşı münasibətlər saxlayıblar. İki ölkə arasında bəzən mübahisələr də olub, ancaq mübahisələr ailələrdə və mehriban qonşuluqda da olur”.

Qiya Abaşidze parlament seçkilərinin Azərbaycanla olan əlaqələrə təsir göstərə bilməyəcəyini qeyd edib.

“İkitərəfli münasibətlər genişlənir və xalqlarımızın layiq olduğu yeni səviyyəyə yüksələcəkdir. Gürcüstan parlament seçkiləri demokratik, dinc və şəffaf keçiriləcək və nəticələr heç bir dost ölkə ilə münasibətlərə təsir etməyəcək”.

Saakaşvilinin “Vahid Milli Hərəkat” partiyasının qalib olma şansına dair suala cavab verən  gürcü politoloq bu ehtimalın aşağı olduğunu bildirib.

Mənim fikrimcə, keçmiş iqtidar partiyası olan Vahid Milli Hərəkat (VMH) parlamentdə zəfər çalması üçün çox aşağı şansa sahibdir. Birincisi, bir neçə sorğuya görə, VMH-nin bəyənmə reytinqi qanunverici orqanda çoxluq qazanmaq üçün kifayət deyil. İkincisi, VMH müxalifətdəki digər oyunçularla koalisiya hökuməti şansı istisna olmaqla çox aqressiv bir qarşıdurmaya başlayıb. Və son olaraq, hakim Gürcü Arzusunun, anketlərin də göstərdiyi kimi bir hökumət qurmaq üçün kifayət qədər dəstəyi var.

Politoloq hesab edir ki, Saakaşvili Gürcüstanda hökumət qura bilməz.

“Mixeil Saakaşvilinin Ukrayna vətəndaşı olduğu üçün artıq Gürcüstan vətəndaşı olmadığını vurğulamaq lazımdır. Xarici vətəndaş Gürcüstanda hökuməti qura bilməz. Artıq Saakaşvili Gürcüstan məhkəmələri tərəfindən bir neçə cinayətə görə qiyabi məhkum olunur”, deyə politoloq fikirini tamamlayıb.

Ülvi Əhmədli