Dünən Ermənistanın Xarici İşlər naziri Ara Ayvazyan qondarma rejimin rəhbərləri ilə görüş keçirib. Bu addım Azərbaycan tərəfindən Xarici İşlər Nazirliyi səviyyəsində qınanılıb.
Atəşkəs bəyanatından sonra Ermənistanın bu səfəri planlaşdırması ciddi suallar doğurur, bu, həm bəyanatın müddəalarına, həm də münaqişənin tam həlli yolunda aparılan prosesə kölgə salır.
Eurasia Diary Ermənistanın dekonstruktiv mövqeyi və müharibə sonrasında atdığı addımların izahı üçün Cənubi Koreyanın Regionşünaslıq üzrə Hanquq universitetinin professoru, politoloq Rövşən İbrahimovun fikirlərini öyrənib.
“Dünən Azərbaycan Xarici İşlər Nazirliyi Ermənistan xarici işlər nazirinin səfərini qınayan bəyanatla çıxış edib. Əlbəttə, Azərbaycanın razılığı olmadan istənilən şəxsin həmin regiona səfəri beynəlxalq normalara və Azərbaycan qanunlarına tamamilə ziddir və sərt reaksiya verilməlidir. Bunun keçid dövrünün olmasından və ya əvvəlki vəziyyətin qalmasından asılılığı yoxdur”.
Politoloq qeyd edir ki, Ermənistan bu addımlarla yenidən destruktiv (dağıdıcı) mövqe sərgiləyir.
“Bu indiki yaranmış vəziyyətlə barışmamaq mənasına gəlir. Əslində isə bu daha çox Ermənistanın daxili publikası üçün nəzərə alınan addımdır. Çünki hal-hazırda Ermənistan cəmiyyətində indiki hakimiyyətə qarşı ciddi narazılıq hökm sürür. Ara Ayvazyanın çıxışları və bəyanatları da tamamilə destruktivizm üzərində qurulub və bunlar Ermənistanla Azərbaycanın yaxınlaşmasına xidmət etməyəcəkdir. Əksinə Azərbaycanın sərt reaksiya verməsi ilə nəticələnəcək”.
Rövşən İbrahimov bu səfərin 10 noyabr bəyanatına uyğun gəlmədiyini bildirirb. O, buna bəyanatda heç bir statusun nəzərdə tutulmaması ilə aydınlıq gətirib.
“Azərbaycan tərəfi dəfələrlə müxtəlif səviyyələrdə bəyan edib ki, artıq hər hansı bir status barədə söhbət belə gedə bilməz. Ümumiyyətlə “Dağlıq Qarabağ Respublikası” adlı fenomen mövcud deyil. Bu sadəcə aqoniya vəziyyətində olan keçmiş separatçı liderlərin öz səviyyələrində nəsə etməyə çalışmalarıdır. Bir neçə gün bundan əvvəl, Ermənistanda onların təhlükəsizlik şurasının görüşü keçirilib. Görüşdə həm də keçmiş qondarma rejimin prezidenti də iştirak edib.
Fikirləşirəm ki, Ermənistan xarici işlər nazirinin səfəri məhz bundan sonra baş verib. Ümumiyyətlə belə baxanda əvvəlki ənənələrə uyğun olaraq Ermənistan xarici işlər naziri birinci səfərini Qarabağa edərdi. Lakin bu dəfə o, bir neçə fərqli ölkələrə səfərlər etdikdən sonra bunu etdi. Yenə də bu, daha çox həm daxili publikada müsbət rəy formalaşdırmaq üçün atılan populist addımdır və həm də Azərbaycana heç nəyin bitmədiyini, vəziyyətin davam etdiyini bildirmək üçün verilən mesajdır. Ancaq bunların boş addımlar olduğunu düşünürəm”.
Ermənistanın keçmiş müdafiə naziri olmuş Seyran Ohanyan özünümüdafiə imkanlarının genişləndirilməsinin vacibliyini qeyd edib. Bundan əlavə olaraq, qondarma rejimin təhlükəsizlik şurasının katibi Vitali Balasanyan isə erməni silahlı dəstələrinin silahı verməyinə ehtiyac olmadığını bildirib və onları qondarma rejimin qüvvələri kimi qələmə verib.
Bütün bunlar sanki Ermənistanın vəziyyətlə barışmaq istəmədiyini və yeni silahlı toqquşmalara hazırlaşdığını göstərir. Lakin iqtisadi və hərbi reallığı nəzərə alaraq, politoloq bunun qısa zamanda mümkün olduğunu istisna edir. Eyni zamanda Ermənistanın bu vəziyyəti davam etdirməsinin də ciddi problemlər yaradacağını bildirib.
“Demək olar ki, həmin vəziyyət davam edərsə, Ermənistan regional əməkdaşlıqdan yenə də kənarda qalacaq, hal-hazırdakı vəziyyətdə bu, ona daha da çətindir. Silahlanmaya gəldikdə bu, son dərəcə çətindir. Ermənistan olduqca böyük itkilər verib. Onların 2021-ci il büdcəsi keçən ilkindən bir az böyükdür, təxminən 10%. Bu isə ciddi silahlanmaya imkan vermir. Əvvəlki potensialın qayıtması üçün illərlə zaman lazımdır, illər dedikdə isə 10 illər 20 illər nəzərdə tutulur. Qeyd edək ki, Ermənistan hələ də Rusiyaya aldığı silahların kreditlərini ödəməyib”.
Rövşən İbrahimov düşünür ki, indiki məqamda Rusiya Ermənistana nə yeni kreditlər verməyə, nə də qarşılıqsız hərbi yardım etməyə hazırdır.
“Ermənsitan 4 milyard dollar həcmində silah itirib, həm də çoxlu canlı qüvvə. Ermənistan 3360 nəfər itkisinin olduğunu rəsmi şəkildə bəyan edib, lakin tanınmaz halda olan cəsədləri də hesaba alsaq bu rəqəmlər artacaq. Ermənistanın silahlanması və revanş almaq üçün addımlar atmaq fikirləri onların iqtisadiyyatını dahada çətin vəziyyətlə üzləşdirəcək, həm də ölkə əhalisinin xaricə miqrasiyası ilə nəticələnəcək”.
Ülvi Əhmədli