Mən Ağdamda, Xocalıda, Gəncədə oldum və kütləvi dağıntıları gördüm.

Bunu Rusiyanın beynəlxalq münaqişələr üzrə eksperti, araşdırmaçı jurnalist Yevgeni Mixaylov Eurasia Diary-yə deyib.

Politoloq bu illər ərzində ermənilərin Ağdamda cəmi iki bina tikməsinə təəccüblənib:

“Onu da inşa etməyiblər, hərbçilərin yaşadığı yeri təmir ediblər,  qalan hər şeyi məhv ediblər. Qəbirlər qarət edilib, hər yer minalanıb, bağlarda ağaclar kəsilib və zədələnib - yəni onlar heç nə yaratmayıblar. Erməni işğalçılarının orada etdiklərindən sonra bilmirəm, xalqların qarşılıqlı əlaqə nöqtəsini tapa biləcəklərmi? Çox istərdim ki, onlar barışsınlar. Vaxt yaraları sağaldır, bəlkə də bir nəsil dəyişəcək və tam sülh bərqərar olacaq. Ancaq bunun üçün səy göstərmək lazımdır. Biz Xocalı sakinlərinin dəfn olunduğu yerdə olduq. Əlbəttə ki, bu faciə hələ bütün dünya ictimaiyyəti tərəfindən düzgün qiymətləndirilməyib. Jurnalistlər çox idi, çox ümid edirəm ki, onlar öz ölkələrinin rəhbərlərinə Azərbaycanın dünyaya çatdırmağa çalışdığı faciənin nə qədər dərin olduğunu çatdıracaqlar".

Daha sonra eskpert, ermənilərin Qarabağ xanlarının dəfn olunduğu yerdə törətdikləri barədə fikirlərini bölüşüb: “Bu da təəccüb doğurur. 18-ci əsrin xanının evindəki xarabalıqlar, məscidlərdə donuzlar. Həqiqətən onların inancına qarşı belə münasibət göstərilməsini istəməzdim. Ağdamda dəhşətli vəziyyətdə olan məscidlər gördüm, donuz, xarabalıq qoxusu gəldi. Bununla onlar başqa inanca öz münasibətlərini göstəriblər. Ermənilər hər şeyi məhv ediblər, ancaq azərbaycanlılar erməni kilsələrinin qayğısına qalırlar. Bakının mərkəzində bərpa edilmiş bir kilsə var. Niyə ermənilər bunu özlərində etmirlər? Bu o deməkdir ki, uzun müddət tərbiyə almaları lazımdır, ya da başqaları onları tərbiyə etməlidir".

Sonda Mixaylov Ermənistandakı daxili siyasi böhrana toxundu. Onun sözlərinə görə, Paşinyan hakimiyyəti əlində saxlamağa çalışır: “Bilmirəm ki, Paşinyanın vəzifəsini tərk etməsi nə qədər sərfəlidir. Hər halda o razılaşma imzalayıb. Kimsə onu əvəz etsə, daha pis ola bilər. Ancaq bundan pisi artıq olmayacaq. Hesab edirəm ki, prinsipcə Rusiya buna imkan verməz. Ermənistandakı daxili siyasi vəziyyətin nəticəsindən asılı olmayaraq, düşünürəm ki, ilk növbədə, Rusiya, Qarabağla bağlı əldə olunan razılaşmaların pozulmasına imkan verməyəcək ".

Hüseyn Səfərov