Ermənistan müharibədən aldığı dağıdıcı zərbənin şokundan hələ ayılmayıb. Amma Ermənistanın və qondarma rejimin siyasi xadimlərinin məntiqsiz çıxışlarının ard-arası kəsilmir.
Ermənistanın Baş naziri Nikol Paşinyan dünən parlamentdə çıxışı zamanı Dağlıq Qarabağın statusu və müstəqilliyindən danışıb. O, Dağlıq Qarabağın Azərbaycandan ayrılmasını dilə gətirib.
Yerevandan çıxan səslər Dağlıq Qarabağda əks-səda verib. Qondarma rejimin təhlükəsizlik şurasının rəhbəri Vitali Balasanyan müharibədə itirilənlərin geri qaytaracaqlarından dəm vurub.
Maraqlısı budur ki, bu fikirlər erməni ictimai xadimləri tərəfindən ümidsiz xalqa ötürülür. Məğlubiyyətlə qəbul edə bilməyən Ermənistanın gələcəyə baxışı ciddi suallar doğurur.
Cənubi Koreyanın Regionşünaslıq üzrə Hanquq universitetinin professoru, politoloq Rövşən İbrahimov Ermənistanda yayılan fikirlərlə bağlı Eurasia Diary-yə şərh verib.
Politoloq nəinki Nikol Paşinyan və Vitali Balasanyanın, erməni siyasətçilərinin əksəriyyətinin oxşar fikirlər səsləndirdiyini bildirib. O, bu sıraya müxalifətin özəyini təşkil edən Robert Koçaryan və Serj Sarkisyanı da əlavə edib.
“Koçaryan Dağlıq Qarabağı heç olmasa Dağlıq Qarabağ Muxtar Vilayətinin sərhədləri çərçivəsində geri qaytarılmasına ümid etdiyini deyib. O, bunun bəlkə də hərbi yolla olmasa da, ən azından danışıqlar yolu ilə vəziyyəti düzəldə biləcəyini əlavə edib. Gördüyümüz kimi, bu fikirlər eşidilir və dəfələrlə Ermənistan Xarici İşlər Nazirliyi tərəfindən də səsləndirilir. Ermənistan XİN-i Dağlıq Qarabağın statusuna toxunur və onun müstəqilliyinin tanınması üçün lazım olan addımların atılmasını vurğulayır. Lakin məsələ ondadır ki, beynəlxalq hüquqda buna heç bir əsas yoxdur. Dağlıq Qarabağın müstəqilliyi üçün sadəcə Azərbaycanın razılığı lazımdır. Ən ağır vəziyyətdə Azərbaycan buna getməyibsə, indi zəfər çalınandan sonra buna niyə getsin. Ermənistan da o vəziyyətdə deyil ki, bu məsələni yerinə yetirsin”, deyə professor söyləyib.
Ermənistan xalqı Qarabağın itirilməsini hələ də qəbul edə bilmir. Bu məqamda siyasi xadimlərin indidən həqiqəti söyləməklərinə əks reaksiya verilə bilər. Politoloq müharibədən qısa müddət keçdiyini və erməni xalqının vəziyyəti hiss etmədiyini deyib: “Erməni xalqı düşünür ki, Azərbaycan bunu 30 ildə edibsə, deməli, onlar da edə bilərlər. Məğlubiyyəti həzm edə bilmirlər. Son olaraq isə siyasətçilər ona görə xalqa xoş olan sözlər deyirlər ki, seçkilərdə qalib gələ bilsinlər. Bu məqamda heç bir siyasi lider Qarabağın itirilməsini və heç vaxt qayıtmayacağını deyə bilməz”.
Ermənistanın Qarabağda nəzarəti qaytarması üçün iki yol var. Birincisi hərbi əməliyyatlar, digəri isə danışıqlardır. Politoloq mövcud vəziyyəti bunların heç birinin mümkün olmadığını qeyd edib.
“Ermənistanın savaş başlatmağa potensialı yoxdur, əgər diversiyaya əl atarsa, Azərbaycan lazımı cavabı verəcək. Diversiyanın olması hal-hazırda birbaşa Ermənistanın əleyhinədir. Baxsaq görərik ki, onlar hələ Azərbaycanın əlində olan silahlıları geri qaytara bilmək üçün əllərindən gələni edirlər, ancaq bacara bilmirlər. Çünki nə qədər danışsalar da haqsızdırlar. Növbəti dəfə bənzər addımlar etsələr, eyni nəticə ilə üzləşəcəklır, çünki Azərbaycan regionda indi daha güclüdür. Onların bütün addımlarını Rusiya-Türkiyə Birgə Monitorinq mərkəzi izləyir. Rusiyaya tam etimad etmiriksə belə, burada güvəndiyimiz Türkiyə var və ərazilərin monitorinqini keçirir və bizə lazım olan məlumatı ötürür. Onun üçün də bu, zaman məsələsidir. Ermənistanda və Qarabağda yaşayan destruktiv erməni toplumunun burada gələcəyi yoxdur. Bu çox rasional və məntiqlidir”, deyə Rövşən İbrahimov vurğulayıb.
Ülvi Əhmədli