Ermənistanın baş nazir əvəzi Nikol Paşinyan Parlamentində çıxışı zamanı elan edib ki, Rusiyanın 102-ci hərbi bazasının Zəngəzurda iki güclü dayaq nöqtəsi yaradılıb. “Gümrüdəki 102-ci hərbi baza Sünik vilayətində 2 dayaq məntəqəsi yaradıb. Onlar İran və Azərbaycanla sərhəd ərazilərdə yerləşdirilib” deyə o, qeyd edib.
Paşinyan rusiyalı hərbçilərin Zəngəzurun təhlükəsizliyinə cavabdeh olacağını söyləyib. O bölgəyə yerləşdirilən rusiyalı hərbçilərin dəqiq sayını açıqlamayıb.
Qeyd edək ki, İlham Əliyev 10 noyabr razılaşmasında "Zəngəzur dəhlizi"ndən bəhs olunduğunu dediyi halda, Nikol Paşinyan bu razılaşmada hər hansı "Zəngəzur dəhlizi"nin nəzərdə tutulmadığını deyərək, Naxçıvan dəhlizinə eyham vurur və razılaşmada yalnız bölgənin blokadadan çıxarılmasının göstərildiyini iddia edir. Azərbaycan prezidenti bildirib ki, Ermənistan istəsə də, istəməsə də Zəngəzur dəhlizi açılacaq. "İstəməsə, zorla həll edəcəyik,"- deyə vurğulayıb.
Və artıq üçtərəfli bəyanatda nəzərdə tutulan kommunikasiyaların bərpası məsələsi ilə bağlı Azərbaycan və Ermənistan arasında yaranan anlaşmazlıq sərt ritorikadan əməli addımlara keçib.
Zəngəzurda Rusiya hərbi bazasının dayaq nöqtələrinin yaradılması Azərbaycanın ərazi bütövlüyünə və təhlükəsizliyinə nə dərəcədə təhdiddir? Beynəlxalq qanunvericiliyə görə Rusiya sərhəd yaxınlığında hərbi baza qurmasına görə Azərbaycana xəbərdarlıq etməlidirmi?
“Ermənistan ərazisində, xüsusilə də Qarabağ sərhədlərinə yaxın bir ərazidə istənilən hərbi obyekt təbii ki, Azərbaycanın ərazi bütövlüyü və təhlükəsizliyi üçün təhdid hesab edilir”. Bunu hərbi ekspert Ədalət Verdiyev Eurasia Diary-yə açıqlamasında bildirib.
“Beynəlxalq qanunvericiliyə görə, Rusiya orada yeni baza deyil, mövcud olan bazanın imkanlarını artırmaq məqsədi ilə dayaq məntəqələrini hazırlayır. Buna görə də, əlavə razılaşma və ya xəbərdarlıqlara ehtiyac qalmır. Lakin nəzərə alsaq ki, Rusiya hazırda Azərbaycanla Ermənistan arasında mövcud münaqişənin başa çatmasını təmin edəcək sülhməramlı fəaliyyətləri həyata keçirir, o zaman biz Rusiyanın bu addımını Azərbaycana qarşı qərəzli fəaliyyət kimi dəyərləndirə bilərik” – ekspert əlavə edib.
Ə. Verdiyevin sözlərinə görə, dayaq məntəqəsinin yaradılmasında məqsəd Azərbaycanı gələcək fəaliyyətlərindən bir qədər ehtiyatlı davranmağa, dolayısıyla Azərbaycanı gələcək mümkün hərbi fəaliyyətlərdən çəkindirmək məqsədi də daşıya bilər.
“Lakin bu addımların, iki dayaq məntəqəsilə Azərbaycanı dayandıra biləcəyini düşünmürəm, çünki ötən ilin payızında başlayan döyüş əməliyyatlarında zatən Rusiya tərəfi Ermənistan ərazisində olan və yeni daşınmalar hesabına Azərbaycanı bu əməliyyatlardan çəkinməyə və yaxud da ən azından dayandırmağa cəhd etmişdi, lakin bunların heç biri gözlənilən effekti vermədi. Odur ki, bu kimi addımlar Azərbaycan üçün ciddi bir nəticə verə biləcək addım kimi dəyərləndirilməməlidir. Bu daha çox Ermənistanın Zəngəzur vilayəti ilə əlaqədar Azərbaycanın verdiyi bəyanatlar fonunda Rusiyanın “Biz erməni qardaşlarımızı darda qoymarıq, biz sizin yanınızdayıq, mümkün olduğu qədər yardım edəcəyik” mesajını vermək məqsədi daşıyır”, o qeyd edib.
Hərbi ekspert onu da əlavə edib ki, Azərbaycan birgə bəyanatın şərtlərinin tam yerinə yetirilməsi və gələcəkdə sülh sazişinin imzalanması, sərhədlərin bərpa olunması proseslərini diqqətlə izləməli və ordunun döyüş hazırlığının daim yüksək səviyyədə saxlanılması, müharibədə istifadə etdiyimiz və resursları azalan silah və texnikaların, raketlərin yenidən alınması və bərpası ilə bu kimi addımlara real fəaliyyətlərlə qarşılıq verə bilər: “Zatən Türkiyə ilə müdafiə sənayesi sahəsində genişlənən əməkdaşlığımız da bu kimi addımlara adekvat cavab vermək məqsədi ilə həyata keçirilir”.
Gülnar Səlimova