Ermənistanda keçirilən növbədənkənar parlament seçkilərində ilkin nəticələr artıq məlumdur. Bülletenlərin əksər hissəsi sayılıb və seçkidə Baş Nazir vəzifələrini icra edən Nikol Paşinyanın başçılıq etdiyi “Vətəndaş Müqaviləsi" blokunun qələbəsi artıq heç kimdə şübhə doğurmur. İlkin hesablamalara görə, keçmiş prezident Robert Koçaryanın “Ermənistan” bloku “Vətəndaş Müqaviləsindən” 3 dəfə az səs toplayıb. Bülletenlərin tam sayılmasından sonra nəticələri Paşinyanın blokunun xeyrinə yenə də dəyişəcəyi proqnozlaşdırılır. Çünki, Koçaryan qazandığı səslərin əsas hissəsini  Ermənistan paytaxtı İrəvanın hesabına əldə edib.

Paşinyan seçkilər başa çatan kimi bəyanat verərək bildirib ki, erməni xalqı bu dəfə “Məxməri” deyil, ”Polad “inqilab həyata  keçirdi. O, həmçinin Rusiyaya göstərdiyi yardıma görə təşəkkür etməyi unutmayıb.

“Parlament seçkilərində qələbəmiz ictimai və milli birliyimizi bərpa edəcək. Erməni xalqı üç ildə iki inqilab həyata keçirdi. Bu dəfə “məxməri” inqilab əvəzinə “polad” inqilab”.

Baş Nazir vəzifələrini içra edən Feysbuk vasitəsi ilə birbaşa canlı çıxışında Rusiya Prezidenti Vladimir Putin və Baş Nazir Mixail Mişustinə göstərdikləri yardıma görə təşəkkür edib.

Amma seçki prosesində Rusiya kütləvi informasiya vasitələrinin keçmiş prezident Robert Koçaryanın xeyrinə daha ciddi iş apardığı məlum idi. Hətta seçki günü müxtəlif saytlarda dərc olunan rəy sorğusuna əsasən Koçaryan 41 faiz səslə öndə gedirdi.

“Vətəndaş Müqaviləsi” blokunun 60 faizdən artıq seçicinin səsini toplayacağı proqnozlaşdırılır və bu da təkbaşına hökumət qurmaq üçün ona kifayət edəcək. Belə olan halda 20 faiz və bəlkə bir az da aşağı səs toplayacaq keçmiş prezident və Xocalı qatili Robert Koçaryanın Baş Nazir kimi yenidən siyasi səhnəyə qayıtmaq arzusu alt-üst olur. Buna görə də o “saman çöpündən” yapışmaqdan əl çəkməyərək seçkinin nəticələrini “olduqca şübhəli” hesab edir. Onun rəhbərlik etdiyi blok seçkidən sonra verdiyi bəyanatda bildirib: “Blokların topladığı səslər arasında ciddi fərqlər var və bu da son 8 ayda qarşılaşdığımız şərait, ictimai və beynəlxalq  rəylər və nəhayət sağlam məntiqlə ziddiyət təşkil edir”.

Bu bəyanat o anlama gəlir ki, seçkilər ciddi qanun pozuntuları baş verib-verməməsindən asılı olmayaraq, Koçaryan nəticələrlə barışmaq fikrində deyil. Elə buna görə də əldə olunan fakta deyil, mifik təfəkkürə əsaslanır. Eyni zamanda, Koçaryanın çabalarını da başa düşmək mümkündür. Bu seçkidə yalnız baş nazir kürsüsənə sahib olmaq onu və ətrafına toplaşdığı qəddar Qarabağ erməni klanını Paşinyanın qəzəbindən qurtara bilərdi. Seçkidə uduzmaq onu siyasi səhnəyə qaytaran yolun tamamilə bağlanması deməkdir. Təbii ki, bununla barışmaq heç də asan olmayacaq.

Əlimusa İbrahimov