Türkiyə Prezidenti Rəcəb Tayyib Ərdoğan hökumətin iclasından sonra xalqa müraciətində Azərbaycan və Türkiyə arasında imzalanan Şuşa bəyannaməsindən söz açıb.

“Şuşa Bəyannaməsi ilə əlaqələrimizdə yeni bir dönəm başlatdıq. Bu bəyannamə çərçivəsində bir çox anlaşmanı çox yaxın zamanda Türkiyə və Azərbaycan olaraq imza altına alacaq, beləcə qardaşlığımızın hüquqi təməlini daha da gücləndirəcəyik. Şuşa Baş Konsulluğumuzun ən qısa müddətdə açılmasından Zəngəzur dəhlizinin bir an öncə işləməsinə qədər gündəmimizdəki hər bir başlığı qərarlılıqla və sürətlə həyata keçirəcəyik. Önümüzdəki aylarda ölkəmizdə gerçəkləşdirəcəyimiz Yüksək Səviyyəli Strateji Əməkdaşlıq Şurasının iclasında bu xüsuslarla əlaqəli konkret addımların çoxunu atmağı planlaşdırırıq. Bundan sonra da Azərbaycanın yanında olacağımızı bütün dünyaya bir daha nümayiş etdik. Qarabağın bölgə üçün nə məna daşıdığı qarşıdakı illərdə bir daha özünü göstərəcək. Bölgənin yeni sabitliyə və rahatlığa qovuşmasından ən çox fayda görənlərdən biri də Ermənistan olacaq. Bu proses Qafqazda yeni bir dövrün başlanğıcı olacaq", - Ərdoğan qeyd edib.

O, həmçinin bir zamanlar münaqişənin həllində vasitəçilik rolunu üzərinə götürmüş Minsk Qrupuna mesaj verdi: “Dünyaya, birinci dərəcədə isə Qərbə deyirəm: “Gəlin, lütfən, Qarabağı görün. Minsk Qrupunun buraları təkrar-təkrar görməsi lazımdır. Kim nələri 30 ildə nə hala gətirib, bunu görün".

Politoloq Əlimusa İbrahimov Azərbaycan-Türkiyə münasibətlərinin yeni mərhələsi üçün təməl daşı rolunu oynayan Şuşa Bəyannaməsi ilə bağlı Ərdoğanın verdiyi açıqlamaları Eurasia Diary üçün şərh edib.

“Türkiyə Respublikası Prezidenti Rəcəb Təyyib Ərdoğanın 15 iyun 2021-ci il tarixində  Azərbaycana səfəri və 28 illik işğaldan sonra azad edilmiş Şuşa şəhərini ziyarəti böyük tarixi və siyasi əhəmiyyət daşımaqla yanaşı İlham Əliyev diplomatiyasının növbəti uğuru oldu. Bu səfərlə bir millət iki dövləti təcəssüm etdirən Azərbaycan və Türkiyə arasında münasibətlər yeni mərhələyə qədəm qoydu. Şuşada müttəfiqlik haqqında  bəyannamənin imzalanması hər iki dövlət üçün strateji əhəmiyyət kəsb edir. Azərbaycan Respublikasının Prezidenti bu münasibətlə bəyan etdi ki, Şuşa bəyannaməsi ikitərəfli münasibətləri daha yüksək səviyyəyə qaldırdı: “Bu səfərin tarixi əhəmiyyəti var. Çünki bu gün imzalanmış Birgə Bəyannamə - Müttəfiqlik haqqında Bəyannamə əlaqələrimizi ən yüksək zirvəyə qaldırır. Bəyannamənin adı Müttəfiqlik haqqında Bəyannamədir və bu ad özü-özlüyündə hər şeyi göstərir, hər şeyi deyir. Biz bu gün keyfiyyətcə yeni əlaqələr qurmuşuq və bu Bəyannamədə göstərilən bütün müddəalar bizim gələcək iş birliyimizin təminatçısıdır”. 

Politoloqun sözlərinə görə, bu bəyannamənin əhəmiyyəti ikitərəfli münasibətlərin bütün aspektlərini əhatə etməsidir: “Bununla Azərbaycan  iqtisadiyyatı, elmi, sənayesi, kənd təsərrüfatı və ən başlıcası milli müdafiə sənayesi və hərbi quruculuğu Türkiyənin malik olduğu standartlara çatdırılacaq ki, bunun da Azərbaycan üçün əhəmiyyətini qiymətləndirməmək mümkün deyil. Bəyanatda həmçinin vurğulanır ki, Türkiyə və Azərbaycan ilk dəfə milli təhlükəsizlk məsələləri ilə bağlı görüşlər keçirəcəklər. Bu o deməkdir ki, iki dövlətin milli təhlükəsizliyi eyni dərəcədə əhəmiyyətlidir və birgə qorunacaq”.

Əlimusa İbrahimov bildirib ki, Şuşa bəyannaməsinin imzalanması tarixi nailiyyət hesab olunmalıdır: “Şuşada bəyannamə ilə bağlı çıxışı zamanı Rəcəb Təyyib Ərdoğan ölkələr qarşısında yeni imkanların açıldığını da vurğulayıb. Şuşa bəyannaməsinin əhəmiyyəti təkcə Azərbaycan-Türkiyə münasibətlərini əhatə etməklə kifayətlənmir. Bu bəyannamə və İkinci Qarabağ müharibəsi zamanı Azərbaycanın yanında olması və ona istənilən sahədə yardım etməyə  hazırlığı Türkiyənin həm beynəlxalq nüfuzunun, həm də digər Türk dövlətləri yanında statusunun daha da möhkəmləndirilməsi istiqamətində əvəzsiz xidmət göstərdi”.

Gülnar Səlimova