Ağdərədə əsir götürülən Azərbaycan hərbi qulluqçusu Cəmil Babayev avqustun 7-də Azərbaycanda saxlanan iki erməni ilə dəyişdirildi.
Qeyd edək ki, Ermənistan mətbuatı avqustun 25-də Cəmil Babayevin Rusiya sülhməramlılarının nəzarətində olan Ağdərədə əsir götürüldüyü barədə məlumat yaymışdı. Azərbaycan Müdafiə Nazirliyinin məlumatına görə, müddətdən artıq həqiqi hərbi xidmət hərbi qulluqçusunun Gəncə hospitalının psixiatriya bölməsini özbaşına tərk etdiyini və haqqında cinayət işi başlanıldığını bildirilmişdi.
Hərbçimizin azad edilməsi ilə bağlı EDNews.net-ə açıqlama verən politoloq Anar Əliyev bildirib ki, Ermənistan mətbuatında olduğu kimi Azərbaycanın bəzi mətbuat nümayəndələri də təəssüf ki, mahiyyətinə varmadan Cəmil Babayevlə bağlı fikirlər səsləndirərkən "Ağdərədə tutulan" terminindən istifadə edirlər: “Bu kökündən yanlışdır və daha çox ermənilərin mənafeyinə uyğun olan bir yanaşmadır. Ağdərə Azərbaycan dövlətinin suveren ərazisidir. Azərbaycan ərazisində heç bir qüvvə Azərbaycan hərbi qulluqçusunu həbs edə, tuta bilməz. Bu o mənaya gəlir ki, Azərbaycan ərazisində hər hansı bir qurum var, Ağdərə ərazisi Azərbaycanın suveren əraziləri deyil, bura daxil olmuş Azərbaycan hərbi qulluqçusu həbs edilib, tutulub. Bu birmənalı olaraq 10 noyabr bəyanatının ruhuna ziddir. Eyni zamanda, Rusiya sülhməramlı qüvvələrinin öz missiyasını düzgün dərk etməməsi ilə bağlıdır. Ona görə də, Ağdərədə Azərbaycan hərbi qulluqçusu tutuldu, həbs edildi yox, məhz terrorçular tərəfindən girov götürüldü kimi qeyd olunmalıdır".
Politoloq həmçinin bildirib ki, Azərbaycan əsgəri Cəmil Babayev 10 noyabr bəyanatı imzalandıqdan, hərbi əməliyyatlar dayandırıldıqdan sonra Azərbaycan ərazisinə qanunsuz yollarla daxil olarkən ələ keçirilmiş erməni terrorçusu ilə dəyişdirilib: "Bəzən suallarla qarşılaşırıq ki, nə üçün əsgərimiz iki erməni terrorçusu ilə dəyişdirilir? Hesab edirəm ki, Azərbaycan əsgəri nəinki iki erməni terrorçusu, yüzlərlə, minlərlə erməni əsgərindən daha qiymətli və daha dəyərlidir. Onların ən yüksək rütbəli generallarından Azərbaycan ordusunun sadə hərbi qulluqçusu daha qiymətlidir. Onlar özləri də Azərbaycan əsgərinin daha dəyərli və üstün olduğunu qarşılıq olaraq iki erməni hərbçisi tələb etməklə təsdiqləmiş oldular".
Ekspertin sözlərinə görə, digər bir məsələ isə girov götürülmüş Azərbaycan hərbçi qulluqçusunun Azərbaycana təhvil verilməsində vaxtın uzadılması ilə bağlı idi: "Hesab edirəm ki, qanunsuz olaraq mövcud olduğu yeri tərk etməklə bağlı Azərbaycan hərbi qulluqçusunu həbs etmək və ya cinayət məsuliyyətinə cəlb etmək yalnız Azərbaycan dövlətinin müvafiq qurumlarının səlahiyyətinə aiddir. Separatçılar və terrorçular tərəfindən Cəmil Babayevin girov götürülməsi mövcud reallıqların, eləcə də 10 noyabr və 11 yanvar razılaşmalarının və Azərbaycan qanunvericiliyinin, Azərbaycan dövlət suverenliyinin kobud şəkildə pozulmasına cəhddir və bu proseslər erməni separatçıları ilə yanaşı, həm də Azərbaycanın Qarabağ bölgəsində müvəqqəti fəaliyyət göstərən sülhməramlıların fəaliyyətsizliyinin, öz məsuliyyətlərini tam dərk etməməsinin, eyni zamanda bir sıra hallarda qəbul edilmiş razılaşmalara və imzalanmış bəyanatlara deyil, erməni separatçılarının maraqlarına xidmət edən addımların nəticəsidir. Girov götürülmüş hərbi qulluqçumuzun geri qaytarılmasının gecikdirilməsilə bağlı Rusiya sülhməramlı qüvvələri və onların komandanlığından hesabat tələb olunmalı və onlar qarşısında bir daha Azərbaycan tərəfinin sərt mövqeyi bəyan edilməlidir. Bildirilməlidir ki, bundan sonra istənilən belə insident və Azərbaycan qanunlarının pozulması halı məhz qarşı tərəfin addımlarının Azərbaycan qanunvericiliyinə uyğunlanlaşdırılması məsuliyyətini daşıyan Rusiya sülhməramlı qüvvələrinin üzərində qalacaq və bunlara cavab verməli olacaq. Azərbaycan tərəfinin belə hallarla bağlı dəfələrlə sərt mövqeyi ifadə olunub. Bir daha qeyd olunmalıdır ki, bundan sonra da istənilən təxribata və atəşkəsin pozulması halına, vətəndaşlarının hüquqlarının pozulması istiqamətində atılacaq addımlara Azərbaycan ən sərt formada münasibət bildrimək gücündədir. Qarşı tərəf bu məsələlərə diqqətlə yanaşmalı və Azərbaycan dövlətinin nələrə qadir olduğunu bir daha götür-qoy etməli və bunları nəzərə alaraq addımlarını atmalıdır".
Gülnar Səlimova
6.3.4. ictimai və dövlət maraqlarının müdafiəsi