Xəbər verdiyimiz kimi, Rusiya sülhməramlı kontingenti Qarabağ dağlarında şərti yaralıların təxliyəsi üzrə təlim keçirib. Rusiya Müdafiə Nazirliyinin saytında dərc olunan məlumata əsasən, təlim Xocalı hava limanında Mi-8 "Terminator" helikopteri ilə, ordu aviasiya pilotlarının, hərbi qulluqçularının və xüsusi təyinatlı dəstənin tibb mütəxəssislərinin iştirakı ilə keçib.

"Bu gün hər cür vertolyotlara quraşdırmaq üçün hazırlanmış iki yerli tibbi modulu olan Mi-8 AMTŞ helikopteri ilə yaralıların uzaq bölgədən təxliyəsi üzrə normativlər keçirildi,"- aviasiya komendantlığının tibb xidmətinin rəhbəri Timur Tsoqoyev deyib.

Qeyd edək ki, keçirilən təlim 10 Noyabr bəyannaməsinin Qarabağ ərazisində istifadə oluna biləcək hərbi texnikası ilə bağlı bəndini kobud şəkildə pozur. Nəqliyyat-hücum helikopterləri sülhməramlıların yerləşdiyi ərazidə hərbi texnika siyahısına daxil edilməyib.

Mövzu ilə bağlı hərbi ekspert Ədalət Verdiyev EDNews.net-ə açıqlama verib.

Ekspert bildirib ki, Rusiya sülhməramlılarının nəzarət etdikləri ərazilərdə döyüş helikopterlərindən istifadə etməsi Azərbaycan ilə Rusiya arasında münasibətlərə kifayət qədər ciddi ziyan vurur.

“Mi-8 helikopterlərinin yaralıların təxliyəsi üçün istifadəsinə aid kadrlar heç də Azərbaycan tərəfini qane edə bilməz. Çünki bu helikopterlər döyüş və kəşfiyyat məqsədli helikopterlərdir və idarə olunmayan raketlərlə silahlanır. Bu helikopterlərin yaralıların təxliyyəsi üçün uyğunlaşdırılan versiyası ağ rəngdədir və onun üzərində heç bir silah olmur”.

Ə. Verdiyev qeyd edib ki, Rusiya tərəfi ilə bu helikopterin Azərbaycan ərazisinə gətirilməsinə dair heç bir razılaşma əldə olunmayıb.

“Bu helikopterlər sülhməramlıların silah siyahısına da daxil deyil. Digər bir tərəfdən isə sülhməramlıların Azərbaycan üçün çox həssas olan Xocalı hava limanından istifadə etməsi tamamilə bu helikopterin tətbiqinə icazə verən sülhməramlı kontingentin komandanlığının səriştəsizliyindən irəli gəlir”.

Ekspert hesab edir ki, sülhməramlıların bu cür kobud şəkildə razılaşmaları pozması Azərbaycanın müvafiq dövlət qurumları tərəfindən qınanılmalı və gələcəkdə təkrar olunmaması üçün ciddi tədbirlər görülməlidir.

“Azərbaycan tərəfi helikopterlərin zərərsizləşdirilməsi üzrə imkanlarını 2014-cü ildə Ermənistana, 2020-ci ilin noyabrın 8-də isə Rusiya tərəfinə nümayiş etdirib. Odur ki, Azərbaycanın səbri ilə oynamağa cəhd etməməlidirlər”, - deyə Ə. Verdiyev fikrini tamamlayıb.   

Gülnar Səlimova

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır